Tsüngrem sentsüwangshidaktsüba

Asenok atema Tsüngrem nungi anguba osang tajung kaji, asenok timtem nung Pa dang ashiba agi asenoki Pa sentsüwangshidaktsür. Iba taochi o ji asenoki Tenüngsang Ken 50:15 nung, ” timtemba mapang nung kü dang jaang, ni na kümzüktsü aser nai ni sentsüwangshidaktsütsü,” ta shia angur. Iba Laishiba tekong ya zünger külen tepela agi Tsüngrem tenüng mesangiang melitetter. Asenok timtem nung aiben asenoki Tsüngrem dang ashitsü mebilemtetter, iba jagi asenoki talila Tsüngrem jashidaktsür aser Pa nungi teyari angutsü melen asenok akoksar aser samar. Asenoki amangba, Abraham, Isak aser Yakob Tsüngrem, shibai asenok menen alangzüktsü atema Par ajaso chir Yisu Khrista nisung kümer alimai yok, iba Tsüngrem ya taochi agi moshia aliba Tsüngrem lir. Iba jagi Pai asenok Pa nungi pilar timtema medoktsüner. Ibayongji, asenoki Pa mebushidangyongi, pai asenok lenji-i talangkati arur. Pa bushira, Pai kümzüktsü aser iba jagi Pa tenüng sentsüwangshidaktsütsü ta asenok nem metetdaktsür. Atangji, kenkenbo Tsüngremi asenok meimba agi asenok nem Pa taochi angatetdaktsütsü mechi timtem ajurudaktsütsüa akok. Iba ama mapang nung asenoki Pa dang shira, Pa kanga pelar aser Pai asenok kümzüker. Asenok nüngdak Pa dang ashiba jagi, asenoki Paji kiburtem madak Kibur aser tsüngremtem madak Tsüngrem ta jangjatsür. Aji oda, asenoki Pa sentsüwangshitsür. Alima nung teti asenok peria dang lira mesüra asenok timmedemi dang lira, ashiko asenoki Tsüngrem amadoktsüa akok. Iba jagi nai nü taküm ya nüsasa lieteter ama bilema asükümadoktsü. Tsüngremi maginübaji ibaji lir. Anema lidaktsüba aser lendong nungi kümzükba ajakji Tsüngrem taochi ajanga lir ta Pai asenok nem angatetdaktsüner. Aji oda, Tsüngremi asenok ya kanga meimer asünungji Pai asenok timtemi maidangyongi asenok kümzüktsü renema lir. Ibaji angatetra, asenok shisabolutsü nüngdak madoker. Ibayongji tenyar Paul-i Filipi 4: 12 nung yamai ashir, ” kechi koda ajemzüka alitsü aji ni metet, aser kechi koda jenti kaa alitsü ajia ni metet, kechisarina nung aser ajak nung, sünga alitsüa aser yaa alitsüa, jenti kaa alitsüa aser anünga alitsü, iba miim oji ni angazükogo.” Iba miim ojj tanga masü saka Paulisa kasa Laishiba nungji ashir, ” Khrista shibai ni tashi itdaktsür Pa dak ni ajak inyaktsü akok.” Iba o ya asenok timtem aser shisabolu mapang nung dang masü saka kaa-itta alidanga Tsüngrem bilemtettsüba o lir. Asenok aika timtem aser makamait agi tonger shisabolua alitsü akok, saka Laishibai ashir, Tsüngrem sentsüwangshidaktsütsü mapangji asenok timtemba mapangji lir. Iba ama mapang ka nung, Tsüngremi asenok nem Pa bushidaktsüner. Ibaji angateta asenoki Pa dang jara asenok nüngdak ajak ataloktsü. Timtemba mapang nung Tsüngrem dang teyari meshibaji asenok meshimetsür masü saka Tsüngrem sentsüwangshidaktsür ta Tsüngremi Pasasa ajemalua asenok dang ashiba o jagi asenok temulung kanga anisüngzüker. Asenok karbo pei temenen agi Tsüngrem tsüngdang akseta pei timtema meshiteti alitsüa akok, saka Tsüngremi ashir, asenoki asen timtem Pa dang ashiba jagi Pa tenüngsang tali sentsüwangshidaktsür. Iba dang nung jagi taochi tuluba asenoki kong angutsü !