Tsüngrem tamang katetba lir

Shibai nenok aja pa temulung lemtettsüsa lir aser pai aji inyaktsü. 1 Tesa. 5:24.

Tsüngrem O temulung lemteta mayu tashi aser inyaktsü asoshi tashi ita maküm tashi kecha inyaktsü Pai asenok majar. Tsüngremi ashiba inyaktsü teti tamang kateta malir, saka Pa teti tamang katetta alir aser Pa tenangzükba atalokdaktsütsü asoshi Pa O nung teti noktaker (Isa. 46:11).
Kodang Israel nungeri Temerem Tzüyim atong, Tsüngremi Pa tenangzükba agienogo ta parnoki bilem. Tzüyimi parnok tejaklen noktang, aser Ejip armyi parnok tepsettsü aria arur! Aji saka Tsüngremi Pa tamang katetba kuli asü. Pai Par chirtem jembiba O ajak nung tamang katetta aliba kuli asü.
Tsüngremi temeja mapa kar indang ne den jembir alitsü akok – ner arogo nung tenzüktsü, ner tanurtem sayutsü mesüra nai ne mapa nung kechi inyaktsüla. Nai Pa dang tashi angaa aru saka tang nai Temerüm Tzüyim atonger. Tsüngremi kechi inyaktsü nangzük aji mataloker ama nai bilemtsü akok. Ne tenzükba mapa junga magizük ama mesüra ner chirtemi anema apusor mesüra mapa nung külem inyakertem ne mapa anema jembir.
Tsüngrem jakla nung amangang. Tamang katetta alitsübaji Pa yimya. Putu ajak nung Pa nübur taküm kuli T.Ken züluri sangdong: “Ni asangur temeshipur senzüka yutsüba, mesüra pa metsüi meshimetsüba ni mangu.” (T.Ken 37:25).
Na tang kechi tia nung lidir liaka teyimla tesama. Tsüngremer shilem nung tamang mekatetba shingaia ajangshia mali. Kenü anogo Tsüngremi inyakba nai angutsü aser tamang katetba asoshi Pa tenüng asangtsü.