Tsüngrem tenzüker tajung

~ L.Kika Pongener, Aoyimkum,Dimapur.

Yohan-10:11-16. Ni sannüker tajung,sannüker tajungi santem asoshi pei taküm yutsür.Shiba sannüker masü saka aayanger dang aser santemji pa meyong masü,pai tsünü aruyaa angur aser san toktsür ajener; aser tsünu jagi parnok apur aser jenshidaktsür.Pa aayanger ka dang aser santem asoshi mebilemer,anungji pa jena aor. Ni sannüker tajung,aser kübui ni kechi koda metet yamaji ni kü meyong san metet;aser santem asoshi ni kü taküm yutsür,aser iba san ki nung madenba kü meyong ano tanga san lir; itemjia ni anir arutsüla,aser parnoki kü ola angatsü,aser parnok sannüker ka kübok san telok ka akümtsü. Yisui Pa sannüker tajung ta shiogo,kechiaser pai pa taküm rangben pei santem asoshi kangkidong nung tenla agütsütsü mulonga liasü. Pa sannüker tajung kechiaser tebu Tsüngremi Pa koda metet aser ,temulong toka bendanga agütsüa meim,ajioda paia pa santem metet,aser meim. Sannüker tajungi san ki nung aliba santem dang masü,saka san ki nung maliba tanga santema bushia anir arur. Teti tekülem sentepi aruba santem dang masü saka azümesen santem,yi-pur,mozü lar aser züzüa aliba santem ajak dangi tsüngdong kipoksema oa Tsüngrem o sayua Yisu osang tajung angashidakja temulong meyipdaktsütsü asoshi bilemer. Sannuker tajungi kodang alima temenen tongpang,yimten yimli tenokdangba tashi,sorkar temzüng ozüng tesashi,sobaliba yimsuyimbong tentet,loktiliba libaliro tentet tamajung, Election mopong item ama Tzünu tesashi arudang yutsür maor,toktsür majener saka iba asoshi pei taküm tenla agüja tasü itta nokdaker aser alima temenen tashi nem mekokdaktsü-i pei santem kümzüka ayur. Otsü angazükba agi, Palistan lima nung sannuker kati rangdong nung temaitsü alenloker aser aji ammer san telok tejaklen ser kong anentsü, koleni aotsü item ajakji rangdong jagi tamaitsü sayur aser santem jagi ibaji repranga tashi angaa anidaker aser anogo shia pei kibur santem arem moapu rem lanu tajung peria alidak tesem,tzü tajemtsü temeruk tzüpokdak peria akadak tesem bushia anir aor,anogo shia tesem balalai melentepa anir oa chiyungtsü tasen tasen melentepa chiyungdaktsür,lungren lungbang nung masongdaktsüi kümzüka ayutsü atema pai mapang aben parnok chiyima alidak tesem ajunga meita repranga anuker,shirem aser tsünü tesashi arua tepset-alir ta lijakjang ammer mita repranga anüker,aser nikongdang mapang shidak nung kidangi anir orr parnok shia tenüngteta jaa züngdanga san ki nung anioker ta otsü angazük . Ajioda, Yisui pa alima nung taküm alidang ibala sannuker ka mesüka atishia jembi südi ta asenokia osang tajung kakettem nung jagi küli tejangja angur.
Yamaji Tsüngrem-er wadang nung tenzükertem ajak sannuker tajung kaka lir ta angatetdi.Ajioda, Tsüngrem tenzüker tajung kati pei arogo nung züngsem ajunga tenüngteta meteta ayur, nutsüng tasen tejen ajunga bendangteta ayur, shibaji shiba aser kechi komala taküm jenjang ka ajungaji asadanga meteta jangja-jangja ayur,tulutiba nungi tilatiba tashi tenük yoka ajioka ayur,aser sentepi arur-marur,tenla abener-mabener,arogo maparen nung shilem agir-magir, itemla ajunga züngdangteta ayur. Pulpit nung sayutsüngiba kisung dak temulong lemer malir, shilu-shirar,timtemer,manemtsünemer,azümesener ajak kidangi kipoksema orr Tsüngrem o ashir aser sarasademtsür. Ajioda Tsüngrem tenzüker kati kidangi tsüngdong oa sarasadem ka agütsübaji kangasa senti lir. Azümesen mesui nendaka lai tarok bushir sentep shia tanela chiyungtsü tasen tasen melentepa chiyungdaktsütsüla, arogo pur kar atsüngzüka orr ali asü,karbo tesayuba balaka agi mashileni oa ali asü,ano karbo langka kar nung metsüdaker ali asü, ta teti kiboksema oa tesendaktep tajung ayutsüla aser ajak dak alaka pei den külemi tenzükertem aser tenzüklatem ajunga den kecha tebendang makai jungtepa, metettepa, timtem toushi ajunga nung yaritepa aser nungittepa alitsüla.Yisui Peter kinungtsü tetsü’er ki semdanga la ramen agi shiranga aliba ngua aneptsü,Yihuda nungeri temenen nisung ta züngshiba alimelen sarur nisung ka Zakia par kidangi tsüngdong ia temulong meyidakja tekümtet ngudaktsü. Nikodima ama Yihuda nunger council nung yimsusur ka pa dangi ammang nung kecha marendaki arur tanela tekümtet indang asüngdangtettsüsa teti renema liasü, nuktapangdatsür ka kecha mesempai terotu mapang ka nung tzübo nung ajurua temulong meyipdaktsü,Kana yimdak kiyir benjong nunga oa dena shilem agia tesentepertem temoatsü ngudaktsü,pa tembar Lazar süadoker lia oa semdanga shia arudaktsü. Aji oda asenoki Yisu shibai pa sannüker tajung ta ashir, Pa nungi tatishitsü tajung aika angur. Pai pei nutsüng kibong timtem toushi ajunga meteta teti semdangaa tesendaktep junga ayu,temenen nisung dangi süaka mashibangi par kidangi oa ajurutep, yimden yimsüsüra pa dangi mashi mapang ka nung marendaki arua ajurutettsüsa tesendaktep tajung ayu,terotu mapang ka nung suaka azümesena kidang mena melii nungdakba pur ajurua tanela anir aruba mapa nung pa mapang ajunga indok. Aji oda, Tsüngrem tenzüker tajung kati pei kidang, office nung mapang indoka amentsü melena nüngdakba pur ajurua Tsüngrem o shia jajatsüla, mangyim jashi ajunga nung oa adentsüla, lokti senden,sentep-senji aser benjopngbentsü nunga jaokba tashi nungbo ajunga nung tulu-tila mebendangi nungloktsüba ajak nung shilem tajung agia adentsüla. Tila tanurtem Yisu dangi anir arudang Pa nütsüngtemi aridok,saka Yisui item tila tanurtemjia mesüktoki züngoka parnok ji Pa dangi anir arudaktsü aser parnok Pa tekü nung ajunger sarasademja moatsü.
Yohan-21:15-17. nungji züngra Yisui Peter tang ajangajanga asemben yamai shia lir, Yona chir Simon nai ni meimer asü ? Nai ni meimra ‘Kü santem mesuang’,ano tanaben ashi , ‘kü santem nükang ‘,aser ano tasembena ashi ‘kü sanchanutem mesüang’. Ajioda anükba aser mesüba ana ya tetsüngda ongdang itta lir,kodang nükang ta südir,lungren lungbang nung masongdaktsüi,shiruru tesashi nem mengusetdaktsüi kümzüka anüktsüba indang ashir- tetezü alima temenen,lokti temenen aser aibelena teyazü tesayuba item amala nungi kümzüka ayutsü indang ashir. Saka kodang mesüang ta sudir ibajibo rem lanu tesola tajung melentepa chiyungdakja tzü temeruk tasüngtet tajung jemdakja mesutsüba indang ashir, tetezü akhi tejen tesayuba method nung dang masü saka tanü alima putu den medemdanga lai o rateta sayuba, mapang shia Tsüngrem o tasen tasen lesson meranga bushir sayuba aser tanela temeshi nung indaktsüba dang ashir. Ano Yisui tongtipangsa ”Kü san chanutem mesüang” ta shia angur, tetezü san tilatem, tanurtem & lanurtem-a mesentoki mesütsü mamadokli. Arogo nung lanurtem aser tila tanurtem atema rongsen intoktsü mesasatsüla. Aser joko akhi tejen putu mapang tamang kinü asüdang laishiba tekong ka zünger otsü kar shir aji agi peridaktsüba putu to suiogo,lai tekong kar zünger England, America nung atalokba otsü kar mesura alima nung tongtipang nisung kar indang kisüng shir sermon küptokba putu to süitemogo. Saka joko tang yabo lai o temeja aser lai puti tarok bushia sayutsü mapang tongja tongogo. Iba jagi tanü arogotem nung joko toklang tenzükertem ajak lai puti meteter Theological degree tulu azüngertem nüngdaka kümogo. Yamaji tanü arogotem nung sannükertemi-a pulpit nung sayutsüngiba kija agi teperi mekümdaktsüi kipoksema kibong kibongi tsüngdong oa Tsüngrem o ashitsü atsüayong masütsüla,Home Evangelist mesüra Evangelistic Committee lirji ta senzüka metoktsütsüla,office mapa nung mapang kangarabo meintoki nungdakba pur ajunga mapang shidak nung atongtsü azümesen masütsüla. Asüko aser mangyim jashi ajunga nung tama asütsüla,benjongbentsü ,sentep-senji aser lokti senden nunga jaokba ajunga nung tulu tila mebendangi adentsüla.Tsüngrem tenzüker tajungi ali rongsen nung tenük meyoker,rongsen sülen manidaker,arogo nung tashiyim amshia ni tuluba,ni tekolakba, ni mulongba dang agitsü ta kibur makümer,pei mulongba kisüng agi arogo anitsü memeranger,takar-sensaker aser tulur-tilar mebendanger, arogo pur ajak den kasasa litetter. Aji oda inyaktetra Yisu Khrista ama sannüker tajung asütsü. Kodang sannuker ta südir iba nungji Pastor, Tesayula,Youth Director aser Christian Education Director item ajunga dena lir ta angatetdi. Tsüngremi iba o agi pa lartem ajak moajangma.