Tsüngrem tenzüker Tsüknungsangba Kibuba dangi ogo

Dimapur, December 01 (TYO) : Dimapur nung Servanthood Bible College tenzüksang aser nüngtugu sayutsüngir, Tsüngrem nisung Wb.Tsüknungsangba Jamir ajungbena December 01 anepdang Dimapur nung par kidang lia pai tenzüksang Kibuba kidangi ogo. Pa arishi küm 83 liasü.
Pa yashi (November 30) tashi temang kanga junga liasü saka December ka anepdang ana ako meta temang tera mejungi amato saak aser kenpiga lirbo pa yipten nung dang mena lia pa arishi tembanga adok ta Dimapur nung Servanthood Bible College (SBC) nung pa den asüpila sentep agiba mapang par jabaso tambusangi metetdaktsü.
Asür Tsüknungsangba Jamir temang par tetsü taso lima Longsa yimtaki bener matu tsüngda pa den SBC Dimapur nung asüpila sentep sentong nung jembirtemi pa ya ajemalu aser mapa agi liteta sayuba Tsüngrem tenzüker ka liasü ta kuli tajung agütsü. Tanü iba asüpila sentep sentong nung SBC aser Discipleship Bible College nung kaketshirtemi tepila ken tenloktsü aser ano akhidang SBC nung azüngertem Samaro aser Sangro telok natia ken tajung kaka aten. Iba denji Longsatsürtemi asüpila ken ka tenloktsü.
Asür Tsüknungsangba Jamir ya sensaker kibong ka nungi kanga timtema intet saka pai item makamait aser timtem ajak kokteta class ter ajanger 1965 küm Eastern Theological College, Jorhat nung B.Th renem aser 1969 küm Leonard Theological College, Jabalpur nung BD renemer külen ano 1984 küm Life Ministry Bible College Melbourne, Australia nung Diploma of Ministry renemba Laishir ka liasü.
Pa mezüng 1965 nungi 67 tashi Impur Bible School nung tesayur inyaka liasü aser iba sülen Longsa Baptist Arogo nung sannüker mapang tatsüka inyak. Clark Theological College ya mezüngbo Impur nung tenzük aser iba mapang 1975 küm pa CTC nungji tesayur liasü.
Pa ya tang pai tenzükba SBC nung tir aser tesayur mapa dena jangrajangraa inyaka liasü. Iba denji ano International Evangelical Fellowship nunga pa tir liasü. Pai Bible College lapokba ajanga tanübo yang nung jagi züngtetter nisung meyirijang dak tali tesem balala nung Tsüngrem tenzükba mapa nung inyakdagi.
“Mapang kabo SBC tenzüker külen iba anasa aliba ayong agi parnok kimong ajak anenzüka bener toumar liasü, anungji College principal Tsüknungsangbai Tsüngrem dang tzüji nokdangjang ta sarasadem aser iba sülen kopi melii ayong ayimba lenmangji tzüküm tangaleni oa adok,” ta pa den asüpila sentep nung SBC nung Board of Trustees tenüng nung jembidang Wb.Alemtemshi Jamiri metetdaktsü.
Wb.Tsüknungsangba ya bendanga agüja Tsüngrem tenzükba aser Lai o tarok kanga junga rateta agütsüba sayutsüngir tajung ka liasü.
Pa den tatembangba asüpila sentep December 2, 2018 nikongdang 2:00 ako nung Longsa Baptist Arogo tenla kidang agir külen, pa mang, pei tsürabur aremdak, pei tetsü tasoli Longsa nung aremtsü.