Tsüngrem tsübuba lenir

Nagaland nung tang ya Tsüngrem tsübuba lenir bushiba mapang lir. Aji oda, Nagaland asoshibo National mesüra Regional party ta kecha mali Tsüngrem tsübuba lenir aser Yisu dak züngzünga amangba telok ka nüngdaker. Atangji, Nagaland nung alir Naga nungerbo ajak amai Khristan kümer asütsü, anungji lenir ajak Khistan kibong nungi adokba lenirtem lir. Ajisüaka, aikati Tsüngrem metsübur. Tanü Nagaland raksaba aser majungba tebilemtsüji idak nung jagi tenzüker. Tsüngrem metsüburtemi nisungbo kenyongi mali amai dang bilemtsü, iba jagi ochimashi mapa asüyonga shinga mali ama sademsadema inyaker. Iba tebilemtsü ya koktettsü asoshi Khristan kibong shiai Tsüngrem tsübuba lenir adokdaktsütsü asoshi inyaktsü kanga rongdak nüngdaka kümogo. Apijemtsü Shin 9:10 nung ashir, ” Tsüngrem tsübubaji shisatsü tetenzükdak aser Temeshisang metetbaji tangatetba angudak lir.” Tetezü shisatsü angutsü asoshi Tsüngrem tsübutsüla aser tangatetba angutsü atema Yisu Khrista metettsüla. Tanü asenoki shisatsü bushii sen aika endoka kaketreju balalai yoker, ajisüaka shisatsü yabo kaketreju nung masü Tsüngrem tsübuba nungi angur. Atangji, kaketreju nung temetetba angutsü saka Tsüngrem metsübura tashitemetet kümer nübortem timtemdaktsür ka dang akümtsü. Kaketreju nungi angazükba temetetba kecha meliaka Tsüngrem akümtsübua aliba ajanga shisataka aküm aser Egypt lima Yosef yimsüsür aküm aser Babilon lima nung Daniel lenir aküm. Item ajakji Tsüngremi agütsüba shisatsü ajanga nübortem madak lenir akümba liasü. Aji oda, Babilon lima nung Nehemia-a Tsüngrem tsübuba yimsüsür ka aküm. Iba mapang kenü anogo par kinunger kar Yirusalem nungi aru aser pai parnok dang Yirusalem tia indang asüngdangdang, Yirusalem jara ajak laogo aser yimti süngküm kishi ajak rongdoktsüogo ta parnoki pa dang ashi. Idangjisa, temulung shirang marem Nehemia ajep. Tsüngrem tsübuba lenir ka dak alitsüba sempetji aji lir. Tsüngrem tsübuba leniri nübortem kanga meimtsü aser parnok asoshi teti aria bilema alitsü. Iba shisatsü jagidang oagi talang nung aliba pei lima aser yimtsüryimer aser  kinungertem indanga shisabolua bilemtsü. Iba shisabolu jagi pei lima aser pei nübortem indang metenüa asüngdangtsü. Tsüngrem metsübur lenirtemibo pei yimtsür yimer aser adianu kinunger ajuruyonga koma lr (?) ta masüngdangtsü, kechiyong shiranga lir ta mesüra majunga mesüra timtem nung lir ta ashi nüngbo semdangtsüsa mesüra yaritsüsa akümtsü aser sentsü atsütsü, anungji koma lir (?) ta asüngdangtsüa arendaka bilemer. Nehemiabo  par lima Yirusalem nungi aluba kinungertemi alua atong matatet, tongli Yirusalem tia indang asüngdang aser iba osang angashir mapang tatsüka tsüngda pa tonga tur pai anir Yirusalem jara yanglushitsü tenzük. Idangji parnok meküta alir tsükchirtemi Yihuda nungertemji amokmerena tsübudaktsü. Ajisüaka, Nehemiai ashi, tetsübu Kibubai asenok asoshi raratsütsü, nenok pei kibong kümzüktsü asoshi rarang ta ayimoktsü. Iba amaji tanü asen lima nunga yimten raksar aliba yanglushitsü asoshi tamasa asenok ajaki pei kibong raksatsütsüsa ajuruba aser angashiba temenentem  anema tasü itta nokdaktettsüla. Lenir tajung aser tamajung ajak kibong nungi dang adoktsü alinung, Nagaland yanglushitsü aser meraketa alitsü atema  Naga nunger Khristan kibong shia nungi Tsüngrem tsübuba lenir adodaktsütsü asoshi tang nungi terenemshiba balaka nung apusotsüla. Yirusalem raksaa yur bendanglen chuba kidanga Nehemia tipdema melitet ama, asenok Naga lima yamai topur majungtsüsa raksateta yur Naga nunger shinga pei kidang aser bendanglen tesem balala nung anisüngzüka mekazütsüla. Pei lima raksaa yur pei kija ajangzüktsü bilemba nisungjibo pei kin ashioktsür asütsü. Atangji, ibai Nagaland raksaa aliba yanglutsü asoshi Tsüngrem tsübuba nisung bushiba mapang lir. Asenoka Nehemia ama asen lima asoshi jepa sarasademdi aser pei pei kibong nungi Tsüngrem tsübuba lenir adokdaktsütsü renemtsüdi.