Tsüngrem tsütsü

Asen lima kanga majung asütsüa akok, asen loktiliba temenen agi sünga alitsü akok, asen nübortem ochimashi aser nüktapangta temenentem nem moksepdaktsür alitsüa akok, asenok libaliro ajak Tsüngrem tsüngdang tesempatsü mapatem agi sünga alitsüa akok, saka kecha masü, na dang indangindanga lira Tsüngremibo na maitsü, kechiyong pai na ajungbaji jungjunga ajiokteter. Noah mapang alima temenen agi sünga liasü. Pa dak alaka nisung shingaia Tsüngremi aginütsüsa meinyak. Tsüngrem külemtsü melena nisung ajaki süngyanglu külem aser pei nük dang ajungba apia mapa tamajungtem ajak inyak. Tsüngrem dak amanger shinga mali, iba ama alima japujari aser ambangyim agi sünga aliba tensa mapang ka nunga pa kija süaka, Noah-ibo Tsüngrem den indangindanga jaja. Iba ama temenen mapa agi sünger litepba loktiliba nung Noah-er jabasotemia temenen mapa inyakyonga taitsür malitsüba tensa aser lokti ka nung parnok liasü. Ajisüaka, iba ama temenen mapa agi asüngba lima ka nung, Noah-er jabaso asütsübaji alima nung alir ajak dang nungi tia takaba liasü. Kodang Tsüngremi ashiba angaa Noah-i rong yanglutsü asoshi par jabasotem aja, parnoki tebui ashiba angaa küm noklang ka par medemertem aoleni mao, par medemertem kazüdak mekazü, par medemertem achiajemba chia majem, anogo shia tebu den dang rongji yanglua among. Ashiko, Noah-i ali takong nung küm noklang junga rong yanglutsü asoshi ajadang, par jabasotem dang par medemer aser külem lisemertemi tebuji yiar , anungji pai ashibaji mangatsü atema o tapu aika agi mesüzüka alitsü akok, saka Noah-er chirtemi tebu o  medoktsü. Tebuji yiar masü saka Tsüngremi ashiba inyaker ta Shem, Ham aser Japheth nungertemi angateta liasü. Iba ama temenen mapa agi sünger, shingaia Tsüngrem lir ta maliba lima ka nung, pei chirtemi tashi angatsüsa sayutetba aser angatetdaktsüba Noah ama tebu kaji koda tenükshitsüka lir. Nisung ajaki Tsüngrem doktsü saka Noah-i Tsüngrem medoktsü. Iba ama mapang, Noah libaliro ajanga par chirtemi tashi angaa pa den Tsüngremi tenyaba mapa inyakbaji koda jangratemtsü. Tangartembo pei inyaknütsü inyaka jangratema litep, saka Noah-i itemji jangratema mebilem. Paibo Tsüngremi mulungba mapa inyakba nung dang jangratema bilem. Aji oda, Noah tamang aser tashi angaba ajanga Tsüngremi pa dang masü par kibong ajak kümzük. Naoh-i indangindanga aliba ajanga par kibong kümzükba ama, tanüa asenoki Tsüngremi ashiba angaa aliba ajanga asen dang masü saka asen kinünger, asen medemer, asen kiyonger aser asen yimtsür-yimertem kümzüktsü akok. Mapa tamajungi nisung tamajung kümdakja anisaba ama, mapa tajungia nisungtem tajungleni anir. Aji oda, asen taküm azüoka aliba ajanga, asenoki mapa tajung tilaka inyakba ajanga aser aseni ken aremzükba ajanga asen den külemi alir mesüra külemi inyaker takümtem kümzüktsü koka lir. Tangar ajaki achir, ajaki ajemer, ajaki inyaker aser ajak ilen jagi aor, anungji kechi balaka ta bilema asenoka telok tuluba den külemi aodang, memeteti asen taküm dang masü saka asen kibong aser asen lokti ajak samatsüsa anogo ka ajurutsü. Noahi alimai lendong arutsü meteta mali asü, saka pai Tsüngremi ashiba angaa ali, anungji meimlaika alidang, kenü Tsüngremi pa aja aser ashi, ” Na aser nür kibong ajak rong jagi atung, kechiyong iba (temenen) putu nung na kü tsüngdang temeshi nisung lir.” Lipok 7:1. Tanüa asenok alima tzü mopong kanga tsüka kümadoker menoknok, yipru, tzümetsüng aser alima tashidak tapu aika agi amokmerenba mapang ka nung ya, Tsüngremi Noah dang ashi ama, asenok danga ashitsüsa asen taküm Tsüngrem tsütsü alitsübaji kanga tongtibang kümogo.