Tsüngrem yimli

Kotakji Tsüngrem yimli, anungji yangji Tsüngremi mulungba dang inyaker. Aji oda, Tsüngremi kechi ashir aser kechi inyaktsü tenyadir kotak tenyartemi kecha nungnanga melii inyaker. Ibaji mesüka tanü asenok aliba lima nunga asenok kibong aser mapa inyakdak ajak nung Tsüngrem mulung südakjang ta Yisui ashir. Tsüngremji anüng aser ali madak kibur, Pai asenok yanglu ta asenoki amanger, saka asenoki Pai mulungba nung meliner. Aji oda, kiburi ashi mangaba kilirtemji asenok lir. Ibayongji, asenok mulungjang nung tepela malir kechiyong asenok taküm aser kibongji Tsüngrem yimli nung masü moijing yimli nung alir. Iba amaji jashia malitsü asoshi Yisui asenok dang Mathi tapu 6 nung, ” Nü yimli arung, Kotak nung kechi koma lir, yamaji alima nunga nü mulung sang,” ta Tsüngrem dang mepishia sarasademdaktsüner. Alemli Yisu Khrista alimai marudang Yihuda nungertemi Tsüngrem yimliji alima nung bendanger yimten yimsüsüba ajak makdoker, Yehovah Tsüngremi parnok nem yimten tashi agütsür, alima ajak ramoka Israel nungertemi yimsü asütsü ta bilema liasü. Ibayongji, kenü anogo Yisu nütsüngtemia Pa dang Israel nem kodang yimli meyipa agütsütsü ta asüngdangba Laishiba nung angur. Ajisüaka, Tsüngrem yimliji alima yimli amato masü, alima yimliibo rara asee meputep adokdaktsür saka Tsüngremi yimli nungbo teti tepela aser tesünep lir. Ibayongji, anogo shia asenoki Tsüngrem dang kü mulungjangi, ozü kibongi, ozü telok dangi, ozü yimtaki mesüra onok alidaki “nü yimli arung,” ta sarasademtsü Yisui sayu. Tetezü, kü taküm mesüra onok rongnung kotak nung ama nai mulungba dang inyakdakjang ta Tsüngrem dang mepishitsübaji tongtibanga ta asenok nem angatetdaktsür. Tanüa asenok aikati Tsüngrem yimliji asenoki manguba tasür tanülatem alidak kotak limaji danga ta bilemer. Ajisüaka, Tsüngrem yimliji asenoki manguba kotak limaji dangbo masü saka tanü asenok alidak lima aser asenok kibongtem ya lir. Anungji, idaki Tsüngremi mulungba inyaka alitsü tim. Aji oda, kodang asenoki asen taküm, kibong aser lokti ya Tsüngrem yimlia ta angatetter, idangji asenoki Tsüngremi mulungbaji kechi ta angateta inyaktsü merangtsü.  Yimten nunga kodang yimsüsürtemi parnoka Tsüngrem yimli nung tenzüker ta angateta yimsü südir, pei mulungba agi masü saka Tsüngrem mulungba nung yimsü asütsü. Iba kasaji arogo nung tenzükertemia kodang arogoji Tsüngrem yimlia ta angateta tenzükdir, tali tejangraba aser tajungba tenzüktettsü. Iba kasaji nisung shiai pei inyakba mapaji Tsüngrem yimli nung inyaker ta kodang angateta tenzükdir, ochimashi inyaktsüba shisatsüji anasaia marutsü. Aji oda, kodang asenoki Tsüngremi mulungba inyaknüa Pa dang asüngdangdir, Pai asenok dang lenmang sayutsü. Idangjibo asenok Tsüngrem den külemi Pa yimli nung Pai mulungba mapa inyaker tongti kaka akümtsü. Koba mapa südir süang, alima nung Tsüngremi mulungba mapa inyaka alitsübajisa jangratemtsü taketba asütsü. Aji oda, Tsüngremi mulungba inyaktsübaji yimten nung asütsüa akok, lokti nung asütsüa akok, arogo nung asütsüa akok mesüra pei taküm aser kibong business nung asütsüa akok. Atangji, asen taküm nung Tsüngremi mulungba mapa angatettsü aser reprangtettsübaji tasak, ibayongji Yisui asenok dang sarasadema Tsüngrem dang asüngdangtsü ajungshir. Sarasademba ajanga Tsüngremi asenok nem Pai mulungba mapa inyaktsü asoshi renemtsütsü. Aji oda, asen taküm nung Tsüngremi mulungba dang inyakdakjang ta anogo shia asenoki sarasademtsübaji kanga tongtibang lir. Asen aliba lima ya Tsüngrem yimli küma alitsübaji asen taküm aser kibong nungi tenzüktsüla. Idangji dang, ano asen aliba  lima nung Tsüngrem yimli ulushia kümyonga aotsüba mapa nung Tsüngremi asenok amshitsü. Asenoki aiben Tsüngremi mulungba ama masü saka aseni mulungba nung inyaktsü asoshi yimten aser lokti nung shilem agir, kechiyong alima nung arogo dak alaka yimten aser lokti tentetjibo Tsüngrem yimli masü amai bilemer. Ajisüaka, asenoki yimten aser lokti nungbo ‘nü yimli taru, onoki mulungba dang inyakdi,’ ta ashitsü makok. Iba amaji bilema inyakertem aika laoogo aser ano laotsü, anungji asenokibo asen yimten aser lokti nung dena Tsüngrem yimli jaokdi.