TSÜNGREM YIMLI ASER ALIMA YIMLI

~ I.Supong Longkumer,
Darogapathar, Dimapur.

Lipok 1:1-31: Tsüngremi anüng aser alima aser yangji aliba tapu meyina yanglua anogo terok nung renemer anogo tenetbuba nung ajak meshiteta anisüngzük mong among (temeshi anogo), taküm mesütsü pokyimtsü asoshi meimchir nem anogo terok agütsü aser Pa atema anogo ka agiteta ayu.
Tsüngremi ashi tang asenoki asen ama aser asen mesükba nung nisung yangludi (ama tetezü shisatsü) mesük tetezü surupangru. Aser teyangluba ajak madak ketdangsür kümdaktsüdi (kibur masü) tanüker, aser Pa nem ajak azüokdaktsüdi, tetezü yimsü südaktsüdi. Alima nung Khristantem arogo kwi aka item ajak ya Tsüngrem yimli tamaitsü aser alima nung yangertsü. Alima yimten yimli kwi aka item ajak meimchir azüoktsü asoshi. Taküm Tsüngrem memetetaka meimchirji azüoka atatsülasa. Anungji meimchir nem shisatsü agütsü. Tsüngrem mesükba nung yanglubaji metetdaktsütsü atema Yisuji meimchir pok nungi sudaktsü ta angateter. Tsüngremi alima nung Pa yimli yangerbaji tesüngmangtsü ka lir.
Angajemtsü asoshi tongmelang kar. Nisungi chubaji Tsüngrem ama bilem, saka chuba nemji azüokdaktsütsü chuba yimli agütsü saka Tsüngremji ken agi mebilemtet. Anungji Nebukadnezzar chubaji aremi anizük aser arem shiruru den külemi rem mejakdaktsü aser tezüng agi pongpanga küm tenet süidaktsü, Daniel 4:28-33 Tamashi nisungi ozüng raksaba temenen jembir pa nükdang Tsüngrem tsübuba mali.
Alima yimsüsüba menden tuluba tambo ta kecha mali nisüng shia yimsüsür kübok liang, kechiyong tashiji Tsüngrem nungi aser yimsüsüba bangdakji Tsüngremi latettsüba lir. Anungji shibai yimsüsüba bangdak anema nokdaker aser shirnoki yamaji inyaker parnoki peisasa obendangba angutsü Rom 13:1-3″ Iba alima nung aliba meimchirtem azüoker”.
Alima nung aliba Khristanr arogo ya nisunger shisatsü masü saka Tsüngremer yimli mapatong meimchir nem metetdaktsütsü asoshi lir. Tsüngrem meyong arogo meimchir nem achayangdaktsür, shibai peii mulungba inyakdir Tsüngremi merenshitsü aser iba arogo den shibai toktepdir pai/lai Tsüngrem meyong yimli den tokteper, tuluba, tambo ta rakteptsü makoker.
Ao kin rongnung tamangba yimsü aika liaka tanü tashibo ABAM dak alema tanga mongtangbo lia memeteter. Anungji ABAM tenzükertemji Aoli arogo temi shimtetba lir , anungji parnoki kechi inyaker aji arogotemi inyaker, anungji ajaki nungeta yaritepti.