Tsüngrem yimli bushidi

Meimchirtem nüngdaktemji kodanga tatembang maka, aseni nüngdakba  angutsü atema aiben dang meranga inyaker aser Tsüngrem dak amangertemia pei nüngdak atema sarasademer. Tsüngrem ya asen nüngdak ajak agütsüba Tsüngrem ka asünung Pai asen nüngdak ajak meteta dang lir aser agütsütsü mulunga lir. Tsüngrem dang asen nüngdak metetdaktsü dang aseni shidak nüngdaker asü masü mesüra kechi atema nüngdaker Tsüngremia shisadanger. Aseni nüngdaka meshibaji tim dang, asen nüngdaktemji khenkhen Pai tekaraba nung atalokdaktsür aser ano khen khenbo mapang agir. Aseni nüngdaktem ataloktsütsü asoshi mapang kaka Tsüngremi mapang agidang asenoki aiben dang Tsüngrem mali ama temulung nung bilemer, saka Pai mapang agiba ya teimbaka asen tamang tendangba ama ka lir. Aseni maneni tamang agi meshirabang Pai kodanga asen nüngdak matalokdaktsüiang malitsü. Abraham dang Tsüngrem tenangzükba tajung liasü saka pai Tsüngrem tenangzükba matateti kilitsürla nem par jabaso sodaktsü. Asen nüngdaktemji tamang agi meshitsüla aser Yakob-i Kotak tenyar dang “nai memoatsü tashi mechioktsü” ta ashiba ama, Tsüngrem dang aseni, “Nai memoatsü tashi sarasadema tamang agi akhangtsü” ta khangjen khanga meshira Kotak tenyari Yakob moatsüba ama Tsüngremi asenok moatsütsü. Laishiba nung Tsüngrem indang yamai shia angutsü – “Kotak ya Pa menden, aser ali Pa tetsüng ajemetdak”. Bilemdangrabang Tsüngrem ya kanga tulu lir aser Pa kanga tulu asünung Pa matsüngdang tamakoktsü kecha mali. Tsüngrem ya asen nüngdakba aser tebilemtsü dang nungibo kanga agi tuluba lir, anungji Pai asen nüngdakba ajak agütsütettsü aser asen shisabulu ya Pa dang nungi tilaba asünung Pai asen shisabulu ajak endoktsütettsü. Tsüngremi asen nüngdakba ajak meteta lir, saka asenoki Pa dang meshiba ya Pai aginür, kechiyong Mathi 7: 7 nung yamai shia lir – “Meshiang aser ni nenok nem agütsütsü, bushiang, aser nenoki angutsü, akoshiang aser aji nenok nem lapoktsütsü”. Aiben aseni asen nüngdak liaka aseni nüngdakbatem memeshir aser mebushir. Laishiba nung shia aliba nung tamang yur aseni tamang agi Tsüngremer temoatsü kishi nung akoshirabang Pai melapoktsüiang malitsü. Asen nüngdak, khuret aser tebilemba kar lirabang Yisui asen dang – “Nenok tebelemer aser khu reta abener ajak kü dangi arung aser ni nenok nem anisüngzük agütsüdi,” ta ashir. Anungji Yisuibo yaritsü mulunga lirji aseni bushitsüla aser meshitsüla. Aseni asen nüngdak meshidang tamasa Tsüngrem yimli aser Pa temeshiba bushitsüla, kechiyong Mathi 6:33 nung tamasa Tsüngrem yimli aser Pa temeshiba bushira aser nüngdak ajak bendenloka agütsütsü ta shia angutsü.