Tsüngremer mapang nung amangang (T. Ken 94:1-10)

“Kibuba, tamajungertemi kopika… takok angutsü?” (t.3). Ajaki iba tasüngdangbaji asüngdanger. Iba temulung nung shia bilemba o Laishiba nung aiben shia lir. Temeshi nisungtemi ayimtener, “O Kibuba, kobika?” Saul chubai Dawid taküm agitsü arishidang Dawidi iba tasüngdangba aiben asüngdanga liasü, “O Kibuba, Nai nangzükba chuba mendeni ni matudang kobika ni yamai alitsü ? ”
Tsüngrem Pa sentong asenok asoshi kar ta ken züluri ashi. Pai asenok sarasadem angashir aser asen nüngdak meteta lir. Kechi ataloker Pai shidakji metet. Tamajungeri parnok kübok ajak lir ta bilemer. “Aser parnoki ashir, Kibubai tangua mangutsü, mesüra Yakob Tsüngremi tangateta mangatetter” (t.7). “Onoki kechi inyaker angutsü makok; Tsüngremi kecha meinyaktettsü.” Tamajunger tiyazü tamang ibaji lir. Saka ken züluri ibaji apuoktsüba kuli agi langzü. “Shibai tenarong neploktsü, Pai mangashili ma? Shibai tenük yanglu, Pai menguli ma? Shibai kintem o bendanger, oda shibai nisung dang shisatsü sayur, Pai marütsüli ma?” (t.9,10). Tsüngremji asenok dang nungi temeli tatsükba asü? Alima nung kechi ataloker Pai angur. Pai pa nüburtemi ayimtenba angashir aser azüoker.
Mapa ajak asen teka nung ayutsü asenoki bilemer. Mosai iba mapaji inyak aser pa lisem limai odaktsü aser idakji pa küm 40 Tsüngrem nungi angazüka ali. Na “kopika, Kibuba” ta ayimtentsü tia ka nung lir. Tsüngrem dak ranglokang aser tiaji ne dang nungi Pai tajungba metetta lir ta bilemtetang- tali metetta lir. Idangji pa dang ataa liang. Mita liang aser sarasademang. Pai pa tenangzükbatem ayutsü ta nai jangjatsü.
Tsüngrem inyakyim aser mapang angazüktsüji taküm tepiyong mapa lir. Kodang nai Tsüngremi inyaktsü asoshi aremzüka atatsü nüngdakdir, Pa dak mezüngbuba ranglokang aser Laishiba nung Pa tenangzükbatem nung azüitang. Idangji Pai anebaluba nung anisüngzükang. Pai ne tia metet aser Pai pa otem ayur. Pai mapang tetemsü nung inyaktsü.