Tsüngremer ozüng

– T. Imnakala

Tsüngremer ozüng tapu aika asenoki item ozüng balala ajak tashi angatsü pa temelaba aser tashi angartem temoatsü. Tsüngremi ozüng ka mapang balala nung pa nübur den jembiba Laishiba nung angur tashi manger pai merenshitsü angur. Tsüngremi Levi nunger dang ashi, Levi 3:17, Nenoki temo mesüra azü machitsü atema nenok alidak putu ajak nung teti asoshi ibai ozüng ka alitsü. Israel nunger tashi manga kanga aibelenba agi aser mazüoktet nung Levi 7:26, 27 Israel nungertem kongsa lIdir liaka, parnoki azü mesüra shiruru zü chiyongtsü asoshi merenemtsüla, kari iba ozüng raksara iba nisung jentoktsüla. Levi 17 nung azü machitsü ozüng tesashi angur 17:10, Israel kidong aser bendanger shibai shi den azü chidir, pa anema KIBUBA alitsü, aser pei nübur nungi jentoktsü. Sam 14:34, Saul Chubai par sepaitem dang azü dena achiba agi KIBUBA anema temenen temena ta ozüng agütsü. T. Ku 12:23-25 (Tsüngremi pa ozüng tesashi agütsüba Tsüngrem o) Azü dang machitsü kümdangang, kechiaser azüji taküm lir, aser azüji tzü ama ali nung shitokang. KIBUBA nükdang kechi shitak aji nai inyakang, aser ne sülen ne chirtem junga alitsü asoshi nai azüji machitsüla.
Aori tejen Lai O bo magitsü ta kari ashir südi saka tasen Lai tenyartem Tanela temeshi agi sünga Tsüngrem o tesayuba nung T.Mapa 15:20 süngyanglu külemba, oset, chiyongtsü temenen nungi nüktapangta nung, telensetba item temenen den azü machitsü ozüng kasa item ajak nungi pila-a alitsü bendanger dangi züluba ano  29 nung angur, item nungi nenoki pila-a lira nenok junga alitsü, junga liang. Ya Tsüngrem o, Pa ozüng ta angateter.
Nai azü machitsüla ta Lai o nung nguaka yimpazüa dang liasü. Saka kenü anogo asangur kati ayimtena oja arung ni atema sarasademjang ta ashi, pa dang na kechi asü ta asüngdang pai langzü, ni aonung teprong nung amoa mouteter, ain adoker oset raksaja ain adoker aser nisung kar dak züknüa dang aiter aser ni ya mazüokteter ta ashidang, tanela olai yamai kü dang ashi pai azü achir, tashitak tamajung adoktsü, anungji pa dang tebu nai azü achir asü (?) ta asüngdang, Pai langzü, hau tazüa achir.
Ano deobar tenlaki tulu ka nung sayutsüngir kati kanga dang jangratema sayutsüngir saka pai jembiba oji nisung mulongjangi mair, mopongi dang oner  nungzüa tsüngpang aser nisungtem tsüngda nung dang angur. Idangji ni kanga dang aoksa aser süngmangseta ya kechiba ta ashi nung, tanela olai ashi, pa ni anemer iba nisung kechiba pai kü o jembir sayutsünger? Idangji ni aoksa sayutsünger a Tsüngrem anemer lir na (?) ta asüngdang, ano ola jagi ashir, pai azü achir, mojing aser pa tenyartem dang azü achir ta ashi.
Saka ni kuli masü oda küm 20 shi yimya balala nung azü machitsü saka tangari kuli mesüra ni kechi balaka kuli asütsü ta dang bilema aru. Saka 2010 nung tanela ola agi ashi, azü achirtem tepok aser tar tashitak adoktsü aser maneptsü ta ashi nung, kelen tashitak tsübur, kelen mangatetti azü achirtem meimer, kelen Tsüngrem dang tashi angatsüla ta Tir Yimyim nunga zülogo aser 2014, 15 küm ano Aoli Arogo 100 shi-i Asangla, Akala NMM Evangelist arua kuli süogo.
Aikati kanga pelar kodanga mangashi memetet nung chia liasü saka tangbo taia ta angatet nung taia nangzükogo aser joko machir, kari ashir pei mulong azü machitsü indang tejembi ta ashir.
Saka Yisu Khrista temeim nung ya kuli asür, temeimtsü oh! Sayutsüngertem, Arogo nung tongti inyakertem, nai sayudang tajangzük makatsüsa, Tsüngremi na-a meyiper merenshitsüsa aser ne tai agi nübur menendakja tanela nüji mekümdaktsüra Tsüngremer lendong tulu arutsü. Missionarytem Lai o angatetdang, Arogo tenzükertem Tsüngremer Arogo nung, Arogo mapa inyakdang azü soa achiba melenshiang mesüra Tsüngremer tejashiba lendong nung jenokdak makatsü, sati benjongji temeshi kiyimba lir, kibur dang masüngdangi azü soer chia yi jemtepa ngasangatemertem kopika nai Tsüngrem aser tembar anema chidiyongditsü. Asü benjong nung mi ang süang mapui mangyim jashi asüko amang sangwa memetet mulong zürep memetet mulong zürep nung asür kibur den yariteptsü melena asü benjong nung ak 5 tashi 10 tashi tepseta shi maka azü den shi soa yur yi jemteptsü, kima kishi kilong ajak nung yi dang menemer, aya ya atangji Aolima Yisu Khrista Tsüngrem tesangwa milen arur küm 150 süiogo, kotaker revival milong Aolimai yoker küm 40, süra hai Aoertem ne Tsüngremi ne dang peladima? Nai na aser ner chirtem atema temoatsü asü? Atakatem bendener belemdangang, Ao Mungdang aser Ao Arogo tem küm ana asem tashi omen nung ‘Tsüngrem o dangi meyipdi’ ta aliba to yamaisa meyiper no? Tsüngrem temeim agi ni ne dang meima timtem nungi kümzüka na aser ner chirtem temoatsü atema tanela nung sarasadema tajungshiba, tartsüba agi nai Tsüngrem o aser pa ozüng angatettsü zülur. Nungdak lemsatepnüra Asangla, Akala – 9856234913.