Tsüngremer telangzüba mission sapi

Oba, na kechi koda kü dak lir aser ni Ne dak lir, yamaji parnoka asenok dak lidakjang, anungji Nai ni yok ta alimai amangtsü. Yohan 17:21
Samaa aliba lima alangzükba mission nung Tsüngremi aiben meimchir tesendaktepji shilem ka ama jembir (Yn. 13:20; Matt. 25:40). Kuli kaji temeshi metsü, aji chirtem tajung sotettsü aser parnoki Tsüngrem dang tashi angatsü aser parnok Tsüngremer mission nung amshitettsüsa alitsü (Mal. 2:14-15). Kasaji, arogoji Khrista temang lir. Arogo nung Tebu den mission ka nung alitsü makok (1 Kor. 12:12). Asen meketa alir tekümtet asoshi asenok o asenok na tsüngda tesendaktepji kanga tongtipang lir.
Yisu kangki-i matudang Pai nütsüngtem tasü itta alitsü, mesüra tamang katetta alitsü, mesüra Pai kechi sayu aji bilemteta alitsü sarasademer alitsü ta asenoki bilemtsü akok. Aji saka Pai parnok kati ka den meimtepa alitsü sarasadem. Tsüngrem meimtsü saka tangar dang memeimshitsübaji tanelaren tamakoktsü ta Yisui angatetta liasü.
Nai Tsüngrem meimba tetentangbaji nai tangar dang meimer asü masü aji shisadangtsüba lir. Asenoki ashir, “Kotak nung aliba Obala, tebilemtsü Na aser ni tsüngda nung masü. Ni kü mulung ajak agi na meimer. Ni tangar dang memeimtetter.” Aser Tsüngremi ashir, “Ibaji tamakoktsü. Tangar, shirnok asoshi Kü chir asü parnok dang memeimra nai Ni meimtsü makok” (Yn. 13:34-35). Na meketa aliba khristantem den lungjema melira nai Khrista dangi tangar anir arutsü makok.