Tsüngremer tenyaba mapa

Alima tatem tashi oa Tsüngrem temeim angatetdaktsütsübaji asenok Yisu Khrista dak amangertem asoshi Tsüngremer tenyaba mapaji lir. Aji oda, ‘mission’ ta asüba ya Tsüngremi Pa tenzükertem tesem balalai yoka yangji aliba nübortem ammang tia nungi aniteta kümzükba mapatemji asütsü. Tetezü, mission mapa inyaktsüba ya asenoki inyaknüba agi inyaktsüba masü saka Tsüngremi shimer. Asen kija mulungba agi Tsüngrem mapa inyakba aser Tsüngremi shimtetba agi Pai tenyaba mapa inyakba ana tetsüngdangji talangka lir. Ashiko, asenoki mulungba agi Tsüngrem mapa inyakbaji ita sen atema inyaker asütsüa akok, business lenmang ka atema inyaker asütsüa akok, talangi mounüba agi inyaker asütsüa akok mesüra alima tajung aser tasen ka nung ayongayonga lia inyaknüba agi asütsüa akok. Tsüngremer tenzükba mapa nung nisung kar yamaji inyaka lira itemjibo amajok nung belemer asütsü. Aji oda, Misssion mapa ya asenok onülen oa asenok inyaknüdak inyaktsüba mapa ka masü. Ibaibo Tsüngremi shimteter aser Paisa yoker aser item jagi nisungtem mulungjang khenyongi balaka melenshidaktsür. Laishiba nung Tenyar Mapa taputem nungi asenoki akhi Tsüngrem tenzükertem den Tsüngremi koda jembi aser parnoki koda inyak item otsütemji aika angur. Tanü putu nunga item otsütemji asenok dak petpeter aser item otsütem nung jagi asenoki Tsüngremi mulungba angatettsü merangtsübaji kanga tongtibang lir. Aji oda, Tenyar mapa 8 nung Filip-i Samaria yimti nung oagi Yisu Khrista osang tajung sangokja jajadang ‘Revival’ tulu adokba otsü ka angur. Iba tensa nung Khristan-tem atema Yirusalem nung reshikangshi tulu liasü, anungji tenyartemia Tsüngrem mapa sadema meinyaktet aser tamangertema melitet. Iba ama mapang ka nung Filip-i kodang Yisui agütsüba tekümtet osang tajung sangoktsü nübortemi Tsüngrem o ji agizüka amang. Iba mapang Samaria yimti nung tepela tulu liasü. Filip ama sayutsüngir ka asoshi ibaji takok tuluka lir. Iba mapang pai nisungtem dak nungi ola angashia temenen tanüla aridoktsü aser tsüngtsüker aser shirangertem aika aneptsü. Samaria ain tulu amshia sayusang temezünger Simon a dena amang aser Filip nem baptidaktsü. Ibai Samaria nung Filip kanga nüngtugu akümba mapang ka liasü. Ashiko, paibo ano yangji parnok den pelatepa sayatenya mapaji inyaka sayutsüngia mongnüa liasü asütsüa akok. Ajisüaka, tangbo Filip asoshi mission mapa inyaktsübaji Samaria nungerji masü saka Ethiopia nunger teyangluba nisung ka dang Tsüngrem o rateta ashitsübajiang Tsüngremer sentong liasü. Anungji, Tsüngrem tenyar kati Filip dang Samaria toktsür Yirusalem nungi Gazai aluba lenmang jagi oang ta  jembi. Iba lenmang nungji kechi ajurutsü aser kechi inyaktsü ibaji tenyar jagi mashi saka Filip-i Samaria nung pai anguba takok konang nüngsang ajakji toktsür ao. Ashiko, sayutsüngir aikati Tsüngremi apusoa aotsü jembiyonga iba ama takok ngua inyakba tesem ka toktsür aotsü memulungtsüa akok. Ajisüaka, kodang Filip-i tashi angaa apuso, kenpiga orr, Tsüngrem tanülai pa dang pa jakdang kor talungtsü ka ooya alibaji ajateta aotsü ashi. Iba kor talungtsü nungji Ethiopia nunger ka Isaia kaket azünger saka mangateter ta lia tena külemi kor talungtsü nungji mener toudak nung Filip-i Ethiopia nungbaji temulung meyipdaktsüba otsü asenoki angur. Tenyartem mapang Samaria nung aser gari toudak nung revival adokbaji Filip ama Tsüngremi jembiba angashiba aser timtem arema tashi angaba tenyar (missionary-tem) ajanga adok. Tanüa kasa Tsüngremi asenok nem Pa inyakdaktsüner. Ajisüaka, asenokiang Pai jembibaji mangashir  mesüra angashiyonga Yona ama aseni onülen aser asenoki inyaknüdak dang inyaka alitsüa akok. Aji oda, asenoki inyaker saka aseni inyakdak tejang matanger, aseni sayutsüngir saka revival madoker ta asübaji asenoki Tsüngremi mulungba angateta meinyakba agi asütsüa akok. Tanübo asenok ajaki asen alidak aser aseni inyakba mapa ya Tsüngremi mulungba tesem aser tenyaba mapa asü masü ta sarasadema asüngdangdi. Asenok nisung shia tebok asoshi inyakba mapa kaka lir. Aji oda, asenok tebok sünger külen Tsüngremi asenok nem kechi inyakdaktsüner, iba mapaji asenok atema ‘mission’ mapa asütsü. Iba mission mapaji, Filip dang ashiba ama, tanülai asenok dang ashitsü.