Tsüngremer Tereprangtetba – T.Ken 73: 13 – 17.

Bendanga agütsüba Khristan taküm kaji shidakba tetemjen taküm asü? Tashi mangartem azükarua alidang Kibuba dang tashi anga alitsüji tim asü? Asaph süngmangdaktsübaji ibaji liasü.
Tekong 1 – 12 tashi nung atangji pai taküm tajungji züdoka liasü ta pai iba ken nung zülu.” Atangji amajok nung kü mulungjang merüktet, aser tai makaba nung kü teka shidok; kechiyong anogo tepiyong ni kangshir, aser anepdang shia ni merenshir. Ni yamaji jembidir ta ashi asübo; ajiang, ne chirnur putu den ni külaka inyaka lila” ( t. 13 -15).Item ajak ya koda tembang? ” Ya koda angatettsü ta ni bilemdangdang; ni Tsüngrem külemdaki orr, parnok tesü tia mebilemdang tashi, ni atema ya onsara timtemtsü ka liasü” (t. 16,17). Asaphi ajibaji tai liasü, aser iba jagi pai Tsüngrem mebushi tashi taküm indang asüngdanga liasü.
Nai tenem ka talang nungi reprangra, nai langka angutsü. Saka tenem kasaji anasai orr reprangra balaka angutsü. Nai ajiba jagi noksaji melenshir masü, saka ne dak koda kongshir.Anungji asenoki Tsüngrem külemdaki aotsüla. Pa indang Pa külemdak nai kechi angazüker aji tongtipang lir.
Nai ne mulungjang amajok nung merüktetter asü? Atangji, masü.Ajaki temulungjang temerük aginer.Nai ne teka tai mali ta metsükdoker asü? Ajaki teka temerük aginer.Mejembitsü o ne meli agi jembir asü? Tekong 15 nung metsübutsü indang ashir.Nai koda bilemer shidakbaji Tsüngrem dang shiang.Na ratamata lir asü? Süra na Tsüngrem külemdaki aotsü tenüngdaktsü.Tsüngrem den mapang agiang. Pa o nungi ne tebilemba angatettsü.
Tsüngremi angatetba tsütsü nungi ne mangdang meyipa reprangdangang.Nai ajibaji kota ajiba südakjang.Iba jagi na ajujiba nuni kümzüktsü, aser nai Tsüngrem den takokba nung jajatsü.
Nüngdak mapa nung ne tebilemba nungi tepila tulu adoktsü akok. Tsüngremi asenok nem Pai ajiba ama ajidaktsüner.Tsüngrem indang shisadangang aser aji inyaktsü asoshi Tsüngrem külemdaki oang.Tsüngrem o agi ne kolok aser ne mulungjang sünga lidakjang.Ne khuret Pa nem bendanga agüjang.