Tsüngremi agütsüba takok

Nisung taküm nung takok mangutsü tsübuba tetsübu ya tulu lir. Aji oda, takok mangutsü  tsübuba agi Mosai Israel nunger anir Egypt lima nungi apusoa aotsü memulung. Takok mangutsü tsübuba agi Gideon-ia Midian nunger anema nokdaktsü tasü meittet. Tsüngremi Gideon dang Median nunger ket nungi Israel kümzüktsü oang ta ashidang, pai khenbo Tsüngrem danga par nübortem mesüra par yimer mesüra par kidong rongnung ta masü saka “ozü kinüngertem rongnung ni tilatiba,” ta ashiba Obendangertem 6:15 nung jangjajangjaa shia angur. Ajisüaka, kasa Mosa to agi Israel nunger Egypt nung alar tia nung okrongseta lia anitet aser kasa Gideon to agi Midian nunger madak takok angu. Itemji alima otsü nung Tsüngremi ngudaktsüba takoktem lir. Aji oda, tanü asenoki pei mapa nung takok mangutsü tsübur, kechiyong asenoki Mosa aser Gideon amaji Tsüngremi mulungba memetetteter aser Pa dak mamangtetter. Ano külen asenoki asen mapa nung takok angubaji asensasa angu ama asenoki bilemer, ibayongji aika takok anguba sülen taküm raksaa adoker. Aji oda, taküm nung Tsüngremi mulungba metettsübaji asenok ajak atema kanga tongtibang lir. Aseni inyakba mapa ka Tsüngremi mulungba mapa inyaker ta meteta inyakba nung temulung lemtet tulu lir. Taküm nung jangratemtsüji ibaji lir. Mapa tulu-tila kecha mali takokji Tsüngrem ket nung lir. Tetezü Tsüngremi mulungba ama inyakra takok lir aser Pai memulungba inyakra tamakokji idakji lir. Asenok alima nung mapang tatsüka alidang asenok nisung shia nem Tsüngremi inyakdaktsünüba mapa kaka lir. Tetezü Pai asenok nisung shia ya mapa kaka inyaktsü tenyar. Iba tenyaba mapaji meteta asenoki inyakra takokji yangji lir. Tsüngremi asenok nem takok mengudaktsütsü atemabo kecha metenyatsü. Pai tenyaba mapaji meinyakdangyongi asenok  nem takokji yuja  kar ta asenoki angatetdi. Ajisüaka, asenoki metettsüba kaji takokji inyak nung dang angutsü, azüng nung dang angutsü aser apusoa ao nung dang angutsü. Yihusui Amor nunger akoktsüba tongpangji tetsübutsüka liasü saka Tsüngremi pa dang ashi, ” nai parnok tetsübu, kechiyong ni nü ket nung parnok bendanga agütsüogo,” Yihusua 10:8. Atangji, Tsüngremi Israel nungertemi tongpangi yok saka parnok maodangyongi parnok nem takokbo agüjadoker liasü. Asen taküm nung takok angubaji yamaji angur. Asenoki bilemba mesüra aginüba mapang aser mapa nung Tsüngremi takok magütsür, anungji aseni takok ngunüra asenok inyakba mapaji Pai mulungba asütsüla. Nü taküm nung Tsüngremi mapa inyakba aser takok anguba anogotema jungjunga züngdangang. Na timtem nung alidang Tsüngremi na tasü itdaktsür, tangari na mezüngmeshidang Pai nü nem aremzüktsü shisatsü agütsür, nü dangi tatidang arudang ibaji akoktsü shisa tajung agütsür. Item ajakji Tsüngremi renemtsüba takoktem lir. Tangari na arishiaka, nai nüsasa Tsüngremi mulungba inyaker ta meteta inyakra, kecha tetsübutsü mali kechiyong Tsüngremi mulungba inyakba nung teti takok lir. Yihusuai Tsüngremi mulungba inyakdang anüia marakzüi nokdak aser itai ata, koda tesüngmangtsü. Tsüngremi mulungba inyaker taküm nungbo yamajisa ataloker. Tanü asenok loktiliba aser yimten nung takok kanga tokteper aser yamaji takok züngshiteper. Ajisüaka, item takok ajakji Tsüngrem nungi ta mangatetra tashitaitsang Samson ama tamakok aser maaksü nung taküm atemtsü. Kodangsa na timtem shisabolu ajurudir, nai nüsasa nai inyakbaji Tsüngremi mulungba asü masü ta asüngdangang. Aji oda, nai inyakbaji Tsüngremi mulungba süra, kecha shisa tebulu aser tetsübu, kechiyong Tsüngremi na mapusodangyongi takokji nü nem agütsüogo, kechiyong akhidang Mosa, Gideon aser Yihusua nem takok agütsüba Tsüngremji tanüa asen Tsüngrem lir.