Tsüngremi Aniba : T. Ken 25: 1- 22

T. Ken 25 nung asenoki tanela jenjang kar ataloktsüra asenoki Tsüngremi aniba metettsü ta Dawidi ashir. Mezüngbubaji temulung alemba lir. Tekülem ajanga asenoki  Tsüngrem dak temulung lema aliba sayur. Asenok temulungjang Tsüngrem den shidak alitsü asoshi asenoki sarasademtsüla. Ataa alibaji kuli ka lir (t.3,5,21). Tekong 4 aser 5 nung Dawidi anidaktsü mulunga aliba indang jembi. Asenoki anidaktsü mulunga mali tashi Pai mulungba jungkai madoktsütsü. Asenoki temulung lema aliba tanga kuli kaji o kuli  asüba lir (t.5). Kodang asenoki telemtetba tulu agidir, asenoki Laishiba nung mapang indoktsüla.
Temenen nungi temulung meyipbaji Tsüngremi aniba agizüktsü asoshi jenjang ka lir. Dawidi pa menen asoshi jashia liasü. Pai Tsüngremi Pa taochi yimlibilem bilemtetdaktsünü, Dawidi ozüng raksaba masü. Kodang Tsüngremi kar bilemtetter, Pai iba nübu asoshi mapa inyaker. Pai kodanga Pa chirtem mamadoker. Dawidi Tsüngrem dang Pa taochi asoshi mepishi (t.10,16). Kechiaser pai pa tesüiba temenen indang bilema liasü, aser pai item temenentem jagi pa nükjidong metongdangdaktsünü.
Tashi angabaji tanga jenjang ka lir. Asenok ajak temenen purtem lir. Tsüngremi anidaktsütsü asoshi asenok tabensa akümtsü menüngdak. Ajemaluba tetezü Tsüngrem nem bendanga agütsüba. Asenoki Tsüngremi kechi ashir iba nung tashi angara, idangji Pai tanabuba meraji asenok dang sayutsü. Pai anibaji tesem ka nung dang sangwatsüba masü; ibai mera shia sangwatsüba milen lir.
Ano asenoki akhümtsübu sayutsüla. Asenoki Tsüngrem akhüm tsübura asenoki shimtetba nung Pai anitsü. Tsüngrem tsübuba tetezü asenok alar masü; iba tetezü asenoki yimlibilem aser temeim Tsüngrem akhüm tsübur.
Ano asenoki tenendak sayutsüla. Tsüngremi mulungba metettsü aser inyaktsü temela masü. Kodang asenoki Kibuba bushir, tiaji tamajungba akümer aser asenok kisüng akümer. Dawid pa kisüng liasü aser timtema liasü, saka Tsüngrem pa den dena aliba pai bilemtet. Iba jagi pa tsüngchiba aser tashi angaba kadaktsü.
Tanü na Tsüngrem leniba nüngdaker asü? Tekong 1-5 ji ne sarasadem süang aser Pai ne taküm anitsü. Pa dak temulung lemang aser Pa nem bendanga agüjang. Nai Tsüngrem peladaktsütsü aser ne taküm aser tangar taküm nung Pa sentong ataloktsütsü.