Tsüngremi asangba

Asenok ajaki tangar nungi tenüngsang  aginür. Ibaji alima yimya. Ibayongji aiben asenoki tangar nem aseni inyakba mapatemji junger ta shidaktsünür. Asenok tanur   asüba mapang asenoki inyakba mapatem nung asenok tsüraburtemi junger ta ashitsü yongyar. Aji oda, kodang asenok tain akümer asenoki inyakba mapatem nung asenok medemer, yimtsür-yimer, kiyonger aser tulurtemi ashiba otem retreta agir. Tetezü, asenoki inyakba mapa nung tangari junger ta mashi tashi asenok jangramatemer. Yamaji asenoki inyakba mapa nung tangari asenok züngshidang asenok pelar. Ibaji alima nung asenoki inyakba mapa nung takok anguba sempet tuluka angu ama asenoki agir. Ajisüaka, tenyar Paul-ibo nisung nem junger ta shidaktsütsü asoshi masü saka Tsüngrem nem junger ta shidaktsütsü asoshi meranga inyaktsüla ta 2 Korint 10:18 nung shia lir. Paul sayutsüngia jajaba mapang nisung aikati pa anem aser parnoki parnoksasa parnokang tajungba ta jembi. Item jagi nübortem nungi tenüngsang aginü. Item purtem jagi Paul-ia parnok dang junger ta asütsüsa inyaktsü imla. Ajisüaka, Paul-i nisung nungi masü saka Tsüngrem nungiang tenüngsang angutsü teimla nung inyak. Nisungtem nungi tenüngsang angutsübo temela ta Paul-ia meteta liasü saka nisungtemi junger ta ashiba dang nungibo Tsüngremi junger ta ashibajiang tetemsü ta Pauli kanga junga angateta liasü. Aji oda, aiben asenok jembishinü aser inyaksangshi nung ibai Tsüngremi mulungba asü masü, iba yagi Tsüngrem pelatsü asü masü ta bilema inyaktsü melen asenoki asenok den alir nisungtem peladaktsütsü inyakdang aiben asenoki nisung peladaktsür saka Tsüngrem mepeladaktsür. Jubilee among shia asenoki tajung inyakba atema arogoi mesüra teloki tenüngsanga kuli kaket tajung agütsür. Item tenüngsang kuli kakettem jagi asenok ki sünga lir. Ajisüaka, tebilemtsü kaji item certificate-temji kotak nung magizüktetra jenjang makaba tenüngsang kuli kakettemji itemji asütsü. Kenü item certificate-temji bener asenok maaksü ajurutsü aser ajebtsü. Yisuia Pai mulungba masü saka Tebu Tsüngremi mulungba dang inyak. Tetezü, Yisuia nübortem tsüngdang pa tenüngsang agitsü asoshi masü saka Tebu sentsüwangshidaktsütsü asoshi dang inyak. Nisungtemi odia tenüngsang agitsü meranger, anungji temeim agi masü saka tenüngsang agitsü atema nübortem asoshi mapa tajung inyaktsür. Ajisüaka, asen teka tachiji agi tajung inyakbaji tabelen nem temetetdaktsü ta Yisuibo ashir. Tetezü, kechisa asenoki mapa tajung inyaker ibaji temeim agi miima inyakba nung dang Tsüngrem pelar. Aji oda, Mathi 6:2-5 nung ashir, kechisa asenoki miima mapa tajung inyaker, item mapa tajungtem asoshi Tsüngremi asenok nem odia moatsütsü. Tsüngrem tenüng sangang. Asenokibo odia nisung nungi tenüngsang aginür saka Tsüngremi ashir asenok odia moatsütsü. Nisungi asenok odia asangba o Tsüngremi odia moatsüba na koba tuluba asütsü. Asenok mapa nung nisungtemi junger ta ashiba nung asenok temulung melemli aser temulung moululi, saka Tsüngremi junger ta ashitsüsa asenoki inyakdi. Nisungi junger ta ashiba nung asüngbo maaksü ajurutsüa akok, saka Tsüngremi junger ta shitettsüsa asenoki inyakra, asenok alima nung lia, Pai, ajaki ngua, odia moatsütsü.