Tsüngremi ashi angatsüla

Dimapur, June 09 (TYO) : Anogo 40 nü asentenshi sentong tenzüker anogo trokbuba sentep nung o jembir World Impact Community Church nung Pastor Alemsunep Jamir-i Yerimia 29:11 nung ajemdaker Tsüngrem osang aben.

Iba Lai tekong nung ‘Kechiyong nenok asoshi kü sentong ni meteta lir, oda tamajung asoshi masü, tesülen nenok nem teimla agütsütsü, yimjung indang tebilemba, ta Kibubai ashi,’ ta shia lir.

Pai, “Tsüngremi asenok taküm asoshi sentong tajung yuja lir sürnung koda sür asenoki itemji atalokba mangur aser memeteter,” ta ashi.

Ibaji langzütsü asoshi pai pa dak atalokba otsü ka bilemteta ashi.

Pa atema shinba o aika mapang talangka matalok aser ibaji matalok tashi pa kanga jashi, ta pai ashi.

Ajisüaka khenü anogo Tsüngremi kü nem ni majungba angatetdaktsü aser ni melenshir kü taküm rangben Pa nem bendanga agütsüba sülenang Tsüngremi kü nem lenmangtem lapoktsü. Ni kü taküm rangben Tsüngrem nem magütsü liasü aser ni Pai ashi mangaba ajanga Pa sentongtem kü dak matalok, ta pai ashi.

Tsüngremi asenok nem tetuyuba balala agütsür ajisüaka asen tai ajanga itemji meinyakteter aser takok mangur. Asenoki tashi anga nungdang Pa sempettem angutsü. “Asentenshi sentong lakteta agir ajisüaka temelenshi kechi majurur aser mataloker kechiba süra asenoki asentenshi mapang nangzükbatem ka tanga mapa küma meinyaker,” ta Pastor Alemsunep-i kanga sasa ashi.

Asenoki lenmang teindangba nung mejajara Yerimiah 29:11 nung shia alibaji asenok dang nangzükbatem mataloktsü. Tsüngrem sentong kü dak ataloktsü atema ni Tsüngremi ashiba angatsü nüngdak. Tashi tesadang ka angabaji tashi angar masü, ta paisa ashi.

“Ni Tsüngremi kechiba Naga nungerbo America nunger ama mamshir ?” ta asüngdanga liasü. Tsüngremi kü nem iba telangzüba küm trok tashi magütsü ajisüaka küm tenet buba nung Tsüngremi kü dang langzü. Tsüngremi, Ni Naga nunger memeimi mali aser ni nenok majungketnüiang mali, ajisüaka ni Naga nunger mamshibaji nenoki Ni ashiba mangba ajanga lir ta kü dang ashi

1 Samuel 15 nung Tsüngremi Amaleki nunger makang aser yangji aliba ajak meshimeshia samajang ta ashitsü atema Samuel tenya. Ajisüaka Saul-i Agag, san tajungtibatem aser nashi tejepketbatem, san chanutem aser kechi tajung ajak anünga ayu aser itemji meshimeshia mesamatsü. Ibaji ajanga Tsüngrem kanga mepela aser Pai Saul ji chuba rongnung mezüngoki aküm.

“Asenoki Tsüngrem ashi mangara asenok khenü iba jagi samatsütsü,” ta o jembisangi Yerimia 11 nung shia aliba atishia ashi.

“Tashi mangaba ajanga Tsüngrem den tezüngzütep raksar aser pei sasa atakatem jazüker. Tsüngremi asenok dang ashiba ajak tashi angatsüla,” ta pai o tatem küma ashi.