Tsüngremi Jembiba O

Yisu sür külen Par nütsüngtem tetsübu aser terata nung liasü. Parnoki Paji Israel nungertem bendanger
yimli kübok aliba nungi kümzüktsü aru ta bilem saka pa süa adok nungji, parnok teimla ajak samar kodamasüba tia ka nung parnok kimaia madokteti ki telong nung atsüoka liasü. Pa taküm alidang, Pai parnok tsüngdang sayatenya mapa inyakba aser parnok dang Pa sür shia arutsü indang jembiba ajak to amadoker liasü. Parnoki Yisu shia arutsübaji teimlaa meimla. Ibayongji, nütsüngtemibo Yisu leper reprangdangi aotsüa tebilema mebilem. Iba ama mapang ka nung,Yisu sür tasemnep Deobar anepdang yakta tetsür kar teronem menemba bener Yisu rema yutsüdak leper semdangi ao. Atangji, nütsüngtem dang nungibo item tetsürtemiang Yisuji temeimba miem ta iba mapa jagi kuli sayur. Ajisüaka, parnokia Yisu shia arutsüba indangbo mamang. Ibayongji, kodang parnoki Yisu mang leper nung mangu parnok rataa adok. Iba ama mapang ka nung parnoki Yisui ashiba ama Pa shia arutsü ta amanga ali asübo, ratatsü melen tepela agi memeteti ola tuluka adoker lila. Iba amaji ratamataa alidang, kotak tenyari Yisu shia aruba osang sangoktsü aser Yisu taküm alidang pa sür asembuba nung shia arutsü ta ashiba otem nenshia metetdaktsü. Idangji dang tetsürtemia Yisu taküm alidang jembiba otem bilemtet aser amang. Ajisüaka, tejashitsüka, tetsürtemi leper nungi meyipa orr Yisu shia aruba osang tejangja bener arua shiaka, nütsüngtemibo mamang. Iba kasa anogo nung, nisung ana Yirusalem nungi Emmai yimtaki ooya alidang, Yisua tena anasai aru aser par asem külemi ao. Tenajia taoba anogo asem – pezüka tsüngda Yirusalem nung Yisu pua kangki nung angenlokba indang jembia ooya liasü. Atangji, tena jagia Yisuji Israel nunger kümzüktsü asoshi aruba Tsüngrem chir liasü ta amanga liasü. Ajisüaka, süa adok nungji parnoka terata tia ka nung liasü. Parnoki Yisu asübaji mangatet, anungji Pa shia arutsübajibo teimlaa meimla. Ajisüaka, Yisui tena mulungjang nung shisabolua telangzüba ka aginüa tipmedemi alibaji angu. Aji oda, Yisui Pa nütsüngtem tamang aser teimla ajak samar terata tia nung alibajia meteta dang liasü. Iba ama terata aser tetsübu tia nung alidang, Yisui Emmai yimtaki ooya aliba nisung ana dangji Laishiba nung shina aliba ajak rateta ashi. Aji oda, yim tonger külen,kodang tenati tena den aruba nisungba to Yisu liasü ta reprangtet, parnok tepela nung tasü itshir, yangji yongyima meliteti iba aonungjisa Yirusalemi meyipa orr, nütsüng terka den parnok den sentepa aliba medemertem ajak dang, ” Kibuba atangji shia aruogo,” ta metetdaktsüba asenoki Luke 24 nung shia angur. Asenok taküm nunga aiben Tsüngremi moatsüba aser yariba ajangshiogo. Ibaji dang masü saka asenoki tangar taküm aser kibog nung Yisui taochi mapa tulu inyakba sayatenya mapatema nguogo. Ajisüaka, alima nung alir asünungji, ken ken asenok taküm nung tamakok angudang, manemshilu aser asü ama lendong agi atongdang, asenoki Yisu sür shia maru amato bilemer. Tetsürtemi Yisu shia aruba osang shiaka nütsüngtemi mamangba amato asenoki Yisuji asenok den mali amato bilemer, kechiyong Paji asenok tenük agi mangur. Ajisüaka, Yisui asenok shisabolu aser terata tia nung alibaji meteta lir. Asenoki mamangba aser rataba atema Pai maitsür kechiyong Pa temeim aser taochiji asenoki Pa dak mangmangba temenen dang nungi tuluba. Aji oda, asenok den Tsüngrem mali ama bilema alidang, Yirusalem o Emma yimtsüng na tsüngda nisung ana shisaboluseta jajaya alidang Yisui tena anasa oagi külemi ao ama, tanüa YIsui asenok mangmangba purtem aser asenok atsüngzüka aoba purtem bushia arua jembir. Pa shia arur külen, Pai o tasen ka mejembi saka Pai Laishiba nung aliba indangang angatetdaktsü aser Laishiba nung shia aliba otemji angatettsü asoshi Yisui nisungtem mulung lapoktsü ta Luke 24:45 nung shia angur. Ibaji tanü asenok asoshi kanga tongtibang lir. Tanü shi nung Yisu asenok den mali, saka Tsüngremi jembiba otem Laishiba nung shia alinungji, ibaji angatettsübaji asenok atema kanga tongtibang lir. Atangji, Yisu shia aruogo. Ajisüaka, asenoki Laishiba mezüngra aser yangji shia aliba mangatetra mesüra mebilemtetra, Yisu shia arubaji asenok atemabo amajok asütsü. Yisu süogo, Yisu shia aruogo aser ano Yisu tanaben asenok dangi arutsü. Ibaji Lashibai ashir. Ibaji angatettsü asenok mulungjanga lapokjang ta Tsüngrem dang sarasademdi.