Tsüngremi jembir

Ibri tapu 1:1-2 nung ashir, “alemli lenmang tapu aisü nungi ainkertem ajanga asen tetsüteboutem den Tsüngremi jembir külen, item tatembang anogo nung techir, shiba ajanga Tsüngremi anüng ali ajunga yanglu aser kechisarina senmanger asütsü paji shimtet, iba techir ajanga asenok den jembiogo”. Tanü alima nung tashidak wara agi asenok ajak tsübutepba mapang ka nung ya asenoki akhi mapang asen tetsü teboutem den Tsüngremi jembiba lenmangtem bilemdangra, iba tashidak ajanga asenok atsüngzüka oa aliba purtem mesamadaktsünüba agi Tsüngremi jembir südi ta angatetter. Akhi mapang, Tsüngremi nübortem den jembiba lenmangtemji pongmang aser mangdang liasü. Tsüngremi alima lendong tsüdong, tashidak wara, mi, shiruru aser sayatenya mapatem agia nübortem den jembi. Khenkhenbo Tsüngremi ola tilaka agia jembi. Pai nübortem den jembitsü asoshi kotak tenyar aser ainkertem yok. Iba amaji tanüa lenmang balala ajanga Tsüngremi asenok den jembir. Pai jembibaji akhi mapang nung tsüraburtem den jembiba ama asenok dena pongmang nung jembitsüa akok mesüra Tsüngrem chir Yisu Khristai yokba tanüla temeshi ajanga asenok kidang alidang, sentep sentong nung atendang, asü pila sentep nung mesüra kima yimdong ka nung senzüa aliba mapangang ka asenok den Ts?ngremi jembitsüa akok. Ajisüaka, asenok atema tagitsübajibo, koba lenmang ajanga Tsüngremi asenok den jembir ta asübaji masü saka Tsüngremi kechi asenok nem angatetdaktsüner ta asübaji asütsü. Ibayongjiang, Tsüngrem chir Yisu Khrista alima nung alidang pai nübortem den jembidang, “shiba tenarong aten, pai angang” ta aiben ashiba asenoki angutsü. Yisui asenok nem angatetdaktsünüa jembibaji, asenok tenarong matena ta ashirba ama masü saka Pai jembibaji tebu Tsügremi jembir, anungji temulungjang ajak agi agizüka benshiang ta ashirba liasü. Tanüa asenoki Tsüngremi ashibabo mangar saka Tsüngremi ashiba angaa inyaker amato nisung tsüngdang inyaka sayur. Asenoki akhi ama Tsüngremi pongmang nung mesüra shiner mangdanger ajanga mesüra tenla ki tajung nung longsualongsua sentepdak dang jembitsü amai bilemer. Ibayongji, asenok rongnung Tsüngrem dakbo mamanger saka pongmangbo kanga takzüker, peibo sarasadema masür saka shiner mangdanger nem dang sarasademdaktsür, mapa kecha nunga indangindanga malir aser meinyaker saka sentepbo mathir ta asüba tamangertem aser tenüng agi ita sen atema Tsüngrem tenzükertem aika lir. Aji oda, asenoki Tsüngremi jembiba ama Pa mulungba nung aoer masü saka asen ajunga asaa yangluba sentongtem nung aoer. Tsüngremi kechi mulunger ta masü asenok kodang azünger aser shibai aser shirnoki tenla sen teimba agütsür ta asüba nisunger sentong nung asenok jajar. Iba jagi Tsüngrem tsüngdang asenok tenarong maten ama akümer. Aji oda, tanüa Tsüngremi asenok meimba agi tashidak wara tesashi ajanga Pa jak bushidaktsür ser nung, asenoki Tsüngrem tsübur masü saka tashidakang tsübur. Atangji, asenok ochimashiba, japujaritepba aser tebok asoshi dang bilema Tsüngrem tenzükba tesempatsü mapatem agi Tsüngrem kanga jashidar asütsü ta asenokia bilemer. Asenoki tanü Tsüngrem nem tenla agütsübatema, akhidang Malaki ainker mapang amato, ajak dang tamajungba mesüra memerükba rongsentem mesüra teimbaka yur teraka agütsür. Asenoki Tsüngremi magizüktettsüba sentong aser taküm yimya shitak ama agizüka benshir. Tenüng ka agi amanger, tenüng agitsü atema tenlar aser tenüng agidang kechi jembiar memetet zübazübaa sayutsüngir. Yerimia ainker mapang ama, shiner aser sarasademba tesemtem aika lir saka temenen mapa inyakertem anema tasü itta nokdaktetba ainker aser shiner mali. Tsüngrem masü nisung peladaktsüba ainker, shiner aser Tsüngrem tenzükertem agi asen lima sünga lir. Tanüla nungbo itemjiang tashidak wara mesentemji asütsü. Ashiko, tanü asenoki Tsüngrem temeim osang proktsüba mapabo tesü inyaktsü toktsür, asenok jaksajaklema senteptsü asoshi ochimashiba rongsentem bendena tenla ki yangluba mapatem nung Tsüngrem mepelar asütsüa akok. Iba jagi tanü asenok rongsen aser asenok teka agi yangluba tenla kidang senteptsü mekoki kümogo. Ajisüakasa, 2 Peter 3 nung ashi ama,Tsüngremi asenok mesamadaktsünüba agi ajungbena masü saka tashidak wara tulu agi jembir südi. Tsüngremi jembiba nung ya asenoki tenarong tenra, iba mapangba ya asenok asoshibo ano taochi anguba mapang tajung ka asütsü.