Tsüngremi kanga yaridagi

Tanü agi küm 12 tashi kenüamati Tir Yimyim adoka arutetba ya tesüngmangtsüka bilemer, kechiyong küm 12 jakdang asen oshi nung anogo shia adokba osangkaket ka adoktsübaji tamakoktsü mapa ka amato liasü. Ajisüaka, tanübo tamakoktsü agi takoktsü küma küm terana tashi Ao oshi nung osangkaket ka anogo shia adoka arutetbaji nisung tashi agi masü saka Tsüngrem taochi aser tashi ajanga lir ta tali jangjaa metetter. Tanü tashi nunga asen Ao oshi nung hopta nung anogo tenetnüprongla adokba osangkaketbo Tir Yimyim ya dang lir. Iba denji ano Nagaland nung Naga nunger oshi nung adokba osangkakettem rongnung nisung teimtibai azüngba osangkaketji Tir Yimyim asütsü. Ibaji dang masü, saka asenoki Tsüngremi angati moatsüba temoatsütem züngdangdi süra, Tir Yimyim ya Nagaland nung adokba osangkakettem rongnung tanabuba tematiba jenjang nung lir. Ibaji Tir Yimyim nung inyakertem meraket masü saka Ao kin meraket asütsü. Item takok, temoatsü aser meraket ajungaji Tsüngremi asenok nem angati agütsüba taochi aser maongka lir. Akhidangbo, Aotsür Aortem tetsüng agi pei kolak nung khu bener Naga nunger anüdoklen alirtem nüji kümdaktsütsü asoshi kar school tesayur aser kar arogo nung sannüker asütsü oa liasü. Iba mapang tashi nung gari lenmang mali, nisungtemji abensüoshi jungjunga magi, merükmejutsü memetetba shiruru ama liasüba tia nungi nisung mesüka kümdaktsübaji asenok tsüraburtemi inyakba mapatem liasü. Tanüa asenoki oa tenzüktsüla saka aikati moutetter, ajisüaka mulungsüngzüktsü kaji Aor pastor aser master-tem tsüngdong moutetaka, parnok melen amato Tir Yimyim aor aser parnok den jembir. Ibaji ajanga parnoki tangar tebilemba aser inyaksangshi metetter aser asenok tesendaktepa tajungba akangshir. Ano, iba osangkaket adokba ajanga asenok rongnung osangtsüsang metetpelaba dang masü saka pei bilemba aser angatetba shisatsü lemsatepdang asenok shisatsü nung aeinba aser lokti senden medema adenshiba reprangtetter. Item ajak dak alaka ano iba osangkaket adoker külen asen oshi nung maliba olongtem yanglua asen oshi takarba kümdaktsüdagi. Atangji, taoba küm 12 iba osangkaket adoka arudang onok inyakertem dak tashi mait aser tamakok aika reprangteta alitsü. Aiben zülumen meshitak, oren memetong, tanur asoba anogo amadoker madoktsü, ojang paitep tai aser maparen aika nung menendaki inyakba ajangshir alitsü. Ajisüaka, item ajakji tazüngertemi aremzüka tajungba küma metongshija yariba ajanga tanü iba anogo tashi takok tulu nung tongtetogo. Iba takok asoshi tazüngertem dang kanga pelar. Iba osangkaket asoshi takok kaji ano ken asentenshia August ita nungi website lapokba ya asütsü. Iba website ya ajanga tangbo asen lima nung alirtema Tir Yimyim tonga marudang anepdang yakta internet ajanga mobile phone nung dena züngtetter aser bendanglen alima tesem balala nung alirtema pei lima nung atalokbatem pei oshi nung anogo shia azünger. Tir Yimyim ya tapak trok agi tenzükba küm 12 abensadangbo tapak 10 tashi küma adoktetba ya asenok ajak asoshi takok tuluka ama agidi. Ajisüaka, tang tashi nung ngua aruba takoktem ya tatem masü ano tuluba inyaktsü aser talangba aotsü khuret anendaka lir. Naga kin rongnung pei oshi nung anogo shi adokba osangkaket adokba ya osangkaket dang masü kin ka ayak aser sübutsü ama bilema asenoki züngshidi. Kinbo kin ka saka anogo shi adokba osangkaket ka madoktetra asenok sübotsü agi mabensa amato süla ta bilemer. Atangji, ano asenok sübotsü aika agi mabensa, kechiyong maparen aika nung asen kin nungi nisung mali. Kin ka süra item rongnung nisung kabo mesüra anabo anüngdak aser tzüim nung senzürtem rongnunga alitsüla. Iba ama tayongzükba agi asen kin lanurtem mulungjang nung teti jembidaktsütsüla. Iba ama tayongzükba ola agi anibelema memeteti amang agi sangwa küma küm terana iba osangkaket adoka aruogo, Ano, tang nungi tapak teimba, osangtsüsang tajungba aser shisatsü tesademba nung Tir Yimyim ajanga shisatsü lemsateptsü imlaa atadi. Iba teimla tasen nung tazüngertemi ano maneni onok ajungshia yaritepdaktsüner.