Tsüngremi mulungba ama jashiba

Alima nung alir asünungji nisung ajaki tejashitsü jenti ajurur, ajisüaka Tsüngremi mulungba ama jashiba aser alimai mulungba ama jashiba na tsüngda tepila talangka lir. Aji oda, asenok jashibaji tai masü saka asenoki tejashi marem mapa tamajung inyakra, ibajiang tai asütsü. Asenok rongnungi tsürabur, chirnur aser tembar-adianutem alima nungi pilaa aodang, asenok mapa nung tamakok angudang, asenoki mapa kar nung aibelendang aser tangari asenok ashioktsü dang asenok jashir. Item ajakji alima nung meimchir yimya saka asenoki item tejashiba nemji asen taküm kokdaktsüra asenok asoshi ibajiang takoksa tuluba asütsü aser iba ama jashibaji Tsüngremi mulungba masü. Tejashi rongnunga Tsüngremi mulungba ama jashitsüsa lir na ta asenoki asenoksasa asüngdangtsüa akok aser ibaji langzütsü atema 2 Korint 7:10 nung ashir, “Kechiyong Tsüngremi mulungba amato jashidaktsüba agi, tanaben mesasatsüsa, tekümtet asoshi temulung meyipdaktsür, saka alimai tejashibai tasüba adokdaktsür.” Iba Lai o yagi tejashi tapu ana indang ashir. Tsüngremi mulungba amato jashiba tejashi ka aser alimai mulungba amato jashiba tejashi ka. Atangji, tejashi tapu anapronglai nisung mulung kanga zürepdaktsür. Ajisüaka, tepilaji tejashi tapu kati tekümtet agütsür aser kati tasüba adokdatsür. Kibuba Yisu Khrista ashioktsür külen Yihuda Iskariot kanga jashia adok. Pa mulung kanga zürep aser tesasaba tulu liasü. Ajisüaka, iba tejashiba jagi pa tekümtetba mangu saka tasüba ajuru. Alimai mulungba nung jashibaji ibaji lir. Asenok mulung raksaa asensasa asen jashibaji taidok nangzükba mapa ka masü saka tesasaba mapa ka dang lir, anungji kodang asenok jashidir asenok jashiba temenen khuret ajakji Yisu dangi bener aotsü kanga nüngdaker. Aiben asenoki jashiba ajakji Tsüngremi memulungba mapa, anungji jashia kodaser Tsüngrem bushitsü ta bilemer, saka Yisui ashir, ” nenok tebelemer aser khureta abener ajak kü dang arung, ni nenok nem anisüngzük agütsüdi.” Tetezü nenok jashia alidang kü dangi arua nenok tejashi khuret lemsatepang ta Yisui ashir. Peteria pa Kibuba Yisu tsüngdang nangzükba mapa küma meinyaktet, anungji kodang an-i asemben akong, pa kanga aoksa aser kanga jashi, anungji kanga ajeb ta Luke 22 : 62 nung angur. Ajisüaka, Peter atemabo iba tejashibaji Tsüngremi mulungba ama jashiba tejashi liasü. Peter-i kanga jashia pa mulung nung aibelenba nangzük aser Yisu sülen anidaktsü akangshi. Ibai Peter asoshi tejashi mapang ka dang masü saka tai nangzükba mapang ka liasü. Iba anogo nung jagi balaka pa tamang nung akangshi aser iba sülenbo pa taküm nung timtem reshikangshi tetsübutsü mapatem jenti atalokaka, Pai kodanga Yisu menangzüki mali asü. Aji oda, asenok taküm nunga asenoki nangzükba mapatem meinyaktet dang mesüra asenok mapa kar nung tamakok angudang mesüra kari asenok jashidaktsü dang, asenoki Tsüngrem anasai orr tekümtet bushitsü melena tejashi agi asenok taküm samatsüsa asenoki meinyaktsüla. Kodangsa asenok dangi tejashi arur, idangji asen taküm nung tanüla temeshi ajanga Tsüngremi mulungba angatettsüsa mapa inyakdaktsütsüla. Tsüngremi asenok teti pelaa alitsü yanglutsü saka asenoki Pa anema tai mena nungji asenok jashitsüsa asen meketa teti ataloker. Aji oda, Tsüngremia asenok teti pelaa alitsübo meimlar, saka Pai imlabaji asenok jashidang Pa bushidaktsüner aser asenok aibelendang jashibaji dang masü saka taidok nangzükdaktsüner.