Tsüngremi mulungba na asoshi

Teti pelaang, maneni sarasademang. Kechisarena nung tenüngsang agüjang. Kechiyong nenok asoshi Khrista Yisu nung ya Tsüngremi mulungba lir.  –1 Tesalonika 5:16-18
Aikati Yohan 11:35ji tekong tatsütiba ta ashir, “Yisui ajeb” saka ano Laishiba nung tanga tekong tatsütem lir. Tekong 16 nung ashir, “Teti pelaang.” Tekong 17 nung azünger, “Maneni sarasademang.” Tekong 16-18 jagi Khristantem nem tebilemtettsü tulu agütsür. Pauli Filipi nunger dangi züluba shiti nung, “Kibuba nung teti pelaang; tanabena ashir, pelaang” (Filipi 4:4) nung zülu. Pauli tia ajak nung temulung süa aliba ama temulung süa alitsü parnok dang ashi (4:13). Temulung süa alibaji tang na kechi aka iba nung masü saka na kechi maka iba nung ranglokba ajanga temulung süa alitsü ashir.
“Maneni sarasademang.” Asenok teti sarasademba mulungsentsü dener alitsü (tenük amur apudaka sarasademtsüba masü). Chiyongaka, jemaka, mapa nung alidang, kidang mena alidang asenoki Tsüngrem külemtsü akok mesüra tatok meshitsü akok mesüra temepishiba kar Pa dangi bener arutsü akok. “Kechisarena nung tenüngsang agüjang.” Tsüngremi asenok taküm nung kechi inyak iba nung pelatsüla aser tenüngsang agütsütsüla. Khristan ka ama tenüngsang agütsüba mulungsentsü tener asenok alitsüla. Aikati parnok taküm asoshi Tsüngremi mulungbaji kechi ta süngmanger. Junger, yangi aji lir. Teti pelaa mulungsentsü tener alitsüla, maneni sarasademba mulungsentsü nung aser tenüngsang agütsüba mulungsentsü tener alitsüla. Ibaji na asoshi Tsüngremi mulungba lir.
Oba, tanü ni pelaa lidakjang aser ni inyakba nung temeshi mulungsentsü sayudakjang.