Tsüngremi na ammang ajanga anitsü

T. Ken 17 nung ojang asem agi Dawid-i ayimtenba tatsü agi angatetdaktsür. Mezüngbuba oji angang. “Ochiba dang angang, O Kibuba, ni ayimtenba angang” (t.1). Kü tayimtenba Kibubai angashidaktsüner, kechiaser pai shidak angashir, ta Dawidi ashi. “Nai kü mulungjang tendangang” (t.3). Kodang Tsüngremi timtem mapang nung asenok tendanger, ano Pai Pa sasa asenok dang tendanger- asenoki Pai inyakdaktsüra. Kodang na ammang ajanga odir, kodang aonung arudir, kodang nai tesangwa mengui kümdir, Pai kuli asür ta bilemtetang. Dawid temulungjang shidak lir ta Tsüngremi metetta liasü.  “Ochiba dang angang, O Kibuba” (t.1). Kodang na ammang nung lidir, kodang na lendong nung lidir, kodang nai timtem ajurudir, Tsüngremi angashir ta bilemtetang.
Tanabuba O sapiji sottang. Ne lenmang nung kü tetsüng majudoktsü kü tsüng sottang (t.5). Dawidi odang noktaka mali, kecha meinyaki mali. Pa teti inyaklen ali. Kodang asenok ammang nung lidir Kibubai aniba ama ken nung mera ka dang merar. Asenoki mener dang kechi ataloker aji süngmanga malir. Dawidi ashi, “Tsüngrem ni tejakleni anir. Nai sottang, ni aniang; ni majudokner aser malangner. “Tang shibai nenok tetsüng memetsüi lidaktsütsü akok, aser tarak meketi tepela tulu agi pa sentsüwangshi madang yutsütsü akok” (Yihuda 24). Meketbangang. “Ne tashikang akhüm kübok ni miimang: tenükjang ama ni kumzükang” (T.Ken 17:9). Akhümji tetongtangba tajung masü; saka ibai Tsüngrem tashikang akhüm süra, asenoki idakji jenoka alitsü akok. Dawidi tetshiba akhümji kechi? Temeshi dak cherubim tashikang. Dawidi ashibaji ya, “Ni Tsüngrem chuba mendeni arur. Imlibilema ni meketbangang, sottang aser kü dang angang.” Tsüngremi langzü, “Dawid, ni aji inyaktsü. Ni na timtem mapang ajanga anitsü.”
Ajaki timtem mapangji ajurutsüla. Tsüngremi tetendangba mapangji melar kechiaser itemji ajanga Pa sentong atalokdaktsütsü melar. Nai tanü timtem ajurur asü? Bilemtetang, Tsüngrem tamang katetta lir. Pai ne dang angashitsü aser ammang ajanga na anitsü. Pai ne dang kuli südakjang, aser Pa sasa ne dang kuli sayutsü Pa nem mapang tajungji agüjang.