Tsüngremi Naga nunger kanga aochir

Hombar anepdang züngia menoknok tesashi ka anokba ajanga asenok ayipjanga mejanga aliba nungi sakdaktsü aser kanga dang aoksadaktsüogo. Iba mapang nisung aika ki toktsür kima nung lua pungtenba osang angashiogo. Ano nisung kabo taoksakang nung azüklen menden ana amentepa atuba ki tema nungi ali nung pungzükba osanga angashiogo. Iba menoknok ajanga asenok kanga dang aoksadaktsü. Ki chireptsü mesüra azüklen nungi langka kar laoa yirutsü mesüra ali sangdanga ongken taroki aitsü ta asenok kanga tsübudakja temulung anokshitsüogo. Manipur kübok Noney yimtsüng tiyong ser anokba menoknokji Richter scale nung tashi 6.7 asadangtetba menoknok tesashi ka liasü. Regional Seismological Centre-i ashiba agi tawa menoknok anokbatem rongnung tan anokba menoknokji tesashitem rongnung ka liasü. Iba menoknok yagi India kübok northeast tesem ajungalen kongshi aser aji dang masü India den kidangsüa aliba linüktem – Bangladesh, Bhutan aser Myanmar nunga kongshiogo. Menoknok lendong nung Manipur nung nisung 8 tashi asüba osang angazüker aser ano kasa menoknok lendong nung Bangladesh nunga nisung asem asüba osang jangjaogo. Bangladesh nung asürtem rongnung nisung anabo aoksaba ajanga temulungjang timtem adoka asüba liasü ta osang metetdaktsüogo. Asenok meimchirtemi metetzütetba aser mepaitoktetba – menoknok, tzümetsüng, yipru, tsüngpret, rü alaba amala lendongtem dang Tsüngremi inyakba mapa ta ajar. Alima nung tzü, mopung, anüng, ali tetzür mongin nisung aika lir saka parnokia item tatalokbatem metetzüteter aser paitoktsü atema mapa inyaktsü makok. Yaküm April 15 nü India den kidangsüa aliba Nepal linük nung menoknok tesashi ka anokba nung nisung 9,000 den teimba taküm sama, nisung 23,000 shi yiru, kiojen aser rongsen aika samatsü. Iba menoknokji Richter scale nung tashi 7.8 tashi liasü aser iba denji medemdangra January 4, 2016 anepdang 6.7 tashi nung anokba menoknokjia tesashi ka liasü. Kechiba Tsüngremi Naga lima aochir ta süra, tanü tashi nung asen lima nung Tsüngremi inyakba mapa ta ajaba lendong tulu balaka ataloka mali. Hao, tesüiba mapangtem nung yipru, tzümetsüng, anentsü amala lendongtem nung asenoki meima aliba adianu karbo taküm samaogo. Ajisüaka, tanga lima nung atalokba ama nisung taküm aika lalutsüsabo mesüra yiruyibongtsüsabo lendong tulu ataloka mali. Tan atalokba menoknok lendongji asen lima anasa dang liasü aser iba lendong ajanga tangalenbo nisung takümtema samatsüogo. Ajisüaka Nagaland nungbo nisung asüba mesüra yiruba dang masü ki kar raksaba dak alaka ki chirepba dena osang mali. Asenok Naga nungertemi asen Teyanglur Tsüngrem dang kangasa pelatsüla aser pa tali akhümtsübua amangtsü nüngdaker. Tsüngremi iba tashi ang meimtsü, pai asenok tangar dang nungi balaka alia meimer aser iba atema asenoki pa tenüng asangtsüla aser ali nung apudaker pa külemtsüla. Tsüngrem temeimji mezüngdangtet aser pai asen Naga nunger balaka meima aruogo, tang-a meimer aser tarutsü anogotem nunga pa temeim asenok den teti alitsü ta imlar, saka asenoki pa hao ta melii angaka oa asükümra, aser pa yimli mebushira, shibai metet asen Teyangluri pa taochi asen dak nungi agientsü jia meteta mali. Pa taochi agiener tangalen atalokba ama asen lima nunga Tsüngremi inyakba mapa ta züngshiba lendong tulu atalokra, Ayatai asütsü.