Tsüngremi ne dangi shiba yoker?

Aser ni Pa ne nütsüngtem dangi anir aru, aser Pa manebtsütet. Aser Yisui ashi, “O tamang makaba aser mash jajaba putu, Ni nenok den kopiga alitsü? Ni nenok den kopiga aremtsü? Pa kü dangi anir arung.” Mathi 17:16-17
Yisui Pa nütsüngtem temenen tanela aridoktsü aser tanebtsü sayatenya mapa inyaktsü ain agütsü (Matt. 10:8). Nüburtem tenzüktsü asoshi Pai Pa tashi agütsü, aji saka parnoki parnok atema bilemba agi Tsüngrem mapa inyaktsü ain samadok. Kodang Tsüngremi tebu ka nashira aketba jabaso ka anir parnok dangi anir yok parnoki kanga mejungi tamakok angu. Parnoki parnok jenjang atema kanga ulua bilem (Mark 9:32-35). Parnok ajanga Tsüngremi kechi inyaknü iba nung meranglok.
Yisui nütsüngtem dang langzüba nung pa tebang adokba o tesashi dena liasü. Pai Pa nütsüngtem dang tamang makartem aser mashi jajajrtem ta aja aser parnok dang kobika aremzüktsü ta asüngdang! Kechiba? Tangar dangi tekümtet bener arutsü asoshi parnok Pa mission nung adentsüba liasü saka parnok Pa den tesendaktep makai parnok tanelaren ain makai aküm. Tsüngremi shirnok parnok dangi yok parnok nem temang nung aser tanela nung tesünep magütsüteti aküm.
Tsüngremi Pa chir mashi ka dangi yirua alir yoktsü aser parnoki yaritsü Pai yimlar. Nütsüngtem amaji asenoka aseni bilemba nung temulung ajunga agütsür aseni taginüba agi atsü odaktsür Tsüngremi yokba pur dang meyaritetti akümer. Ano tamang yimsü mapa nung onsara mazüngi aliba ajanga tangar dang meyaritetti akümtsüa takoktsü lir. Tsüngremi ne dangi yokba tamang katetba ketdangsür küma yaritetter asü masü teti meyipa reprangang.