Tsüngrem-i ni anitet

~ Mr. Chungtu (Molungyimsen)

Ni tamanger kibong ka nungi soa intet. Saka lanua nungi kanga samaro tashi mangai dang süplepa intet. Anungji, chiyungtsü tamajungtibaji kü sobutsü aser ni asoshi chiyungtsü tajungtiba kümer, küm metsür asem (23 years) tashi  mozü aser yilar süa aru. Iba ama temenen lar kümer jaja arur asünung, Tsüngremji kheni memeteti mapang talangka dang süidaktsü. Iba mapang taküm nung timtem, lendong aika dang ajurua aru. Saka item timtem ajangajia ni Tsüngrem mebushi. Saka liyonga arudang 2013 August 23 anogo kü dak tashidak tulu kati menepadok aser iba timtem yabo tebang agi meshitetba tashidak ka liasü. Aiben tangu mesashiteti kümadokba, temang ajunga agi tashitsü aruba ano aika liasü. Item timtem bener taneptsü asoshi hospital ana aser talang nung aser lenmang balala ajanga ali rongsen jenti indoka taneptsü bushia senzü. Yamaji mapang talang ka dang senzüaka taküm nung taneptsü aser anisüngzük menguteti kidangi tanaben meyipa aru. Ya koda asütsü ta shisabuluseta Tsüngrem dang lenmang ka danga lapokjang ta sarasadema liasü. Aji oda, Tsüngremsa tajungbaji Pai kü dang lenmang sayubaji yamai liasü.

Kenü ni yipten nung ondaker Tir Yimyim paper reprangba mapang ka adianu kari pa taküm nung Tsüngremi Miracle Home Prayer & Counselling Centre (MHPCC) Mokokchung nung mapa inyakba, koba shi aser tanela anaprongla taneptsü, temoatsü anguba taküm kuli tajung ka angu. Iba kuli jagi kü dak kongshia ni kanga pelaa liasü. Atangji, Tsüngremi kü nema lenmang sayuogo ni! ta Pa nem tenüngsang agütsü. Anungji, ozü kibonga 2014 February 13th  nü iba sayatenya tesemji bushia  ao. Aji oda, yangji anogo ka nungi ka ta munga aodang kü dak Tsüngremi mapa inyaktsü tenzük. Talisa Director, Pastor aser Counselors-temi anogo shia Tsüngrem o tajung den lenmang balala ajanga Pa dak amanga shitakba lenmang nung jajatsü sayudang, maneni ni kü tashi mait nangzüka, ni kü taküm nung “Tsüngremji dang kü kümtetdakba aser Kibur” ta amanga  agizük. Yamaji Tsüngremi kü timtem tulu nungi anitet aser tanela nunga ni temoatsü tulu angu. Iba “Miracle Home” nung Tsüngremi shimtetba tenzüker ajak dang kanga pelar aser iba tesem ya ni ama teimla samar aliba nüburtem jenti asoshi temoatsü tesem südakjangma ta sarasademtsür. Kechiaser iba tesem ni aser ozü kibong asoshi shi aser tanela nung tanaben asoba tesem ka kümdaktsüba asoshi Tsüngrem tenüng maneni asanger.

Temeim adianu, ni ama yi aser mozü lar kümer kar danga lenmang menguteti nemzüa lira, arung memenudang Tsüngrem dangi temulung meyipdi. Yohan 15:14   nung  ashiba ama; asenoki dang Pa o nung tashi anga temenen lenmangtem aser mapatemji dang doktsüra asenok kodanga rongjena, shisabulua  malitsü kechiaser Pa asenok den aser asenok Pa den külemi jajatsü. Tembar tajungi asenok kodanga mesendoker. Halilujah!pelaseta Yisu bushidi.