Tsüngremi nisung shia sentong ka yur yanglu: CM TR Zeliang

December 12, 2016 nü State Banquet hall nung Chief Minister, T.R Zeliang aser pa kinüngtsü, MLA tem, Disabled tanurtem, tesayurtem aser sentong tayongertem külemi tangokba noksa nung angur. 

Kohima, December 12 (TYO): “Temang aser shisatsü nung tangar memenepertem ya atakatem ka masü, saka Tsüngremi nisung shia balala aser nükjidong kaka yur yanglu, aser nisung ajakji balaka lir aser ajak dak sempet lir; temulungtetba dang lira tamakoktsü kecha mali,” ta Nagaland Chief Minister, T.R Zeliang-i ashi.
Tangar memeneper tanurtem atema NAPAD (Nagaland Parents Association for Disabled)-i State Banquet hall nung ayongzükba sentong ka nung jembidang Chief Minister-i iba o ya jembia liasü, ta tanü Media Cell Chief Minister’s Office sangdong ka ajanga metetdaktsü.
“Tanü tanurtemi ken aser action ia ken atenba ajanga asenok kongshiogo, aser parnoki kanga junga shilem agiba ajanga asenok ajungmesor, aser parnoki shilem agibaji ajanga ‘kecha tamakoktsü mali’ ta asenoki meteter. Tangar memenepba tanurtemi saisapong aser tanga lenla nunga junga inyaktetba kuli asenoki angur. Asenoki parnok ajungshitsüla aser asen lokti nung dendaktsütsüla,” ta T R Zeliang-i ajak ajungshi.
Tesayurtemi tanurtem atema kanga meranga inyakba asoshi tenüngsang agüja Chief Minister-i, iba mapaji temela masütsü saka pei tajungtiba agi tenzükang aser maneni tanurtem atema inyakang, ta ajungshi.
Tsüraburtem nem tenüngsang agüja Zeliang-i, tsüraburtemi item ama tanurtemji bendanga mamshii school-i yokba aser parnok dak teimla akaba atema tenüngsang agütsütsü tetemsü, ta ashi.
Sorkari maneni parnok maparen nung nungita yaritsü ta shia Zeliang-i NAPAD nem sen lakh 6 tenla agütsü; iba senji item ama tanurtem atema amshitsü.
Kasa sentong nung State Commissioner Disability, Dr Atha Vizol-ia, “Disability indang rajema maliba aser osangtsüsang junga rajema maliba ajanga differently abled tanurtem nem maongka magütsür, bendanga amshir aser sendoka yutsür,” ta ashi.
2011 küm Census nung ajemdaker paisa, Nagaland nung nütsüng lakh 20 shi lir aser PWDs (People With Disability) 29,631 shi lir, ta metetdaktsü.
Iba sentong nung Daniel Thong Seb, Vice President NAPAD-i lokti pelaa agizük aser Zale Lohe, Co-ordinator BK NAPAD-i tepela anküp o jembia liasü.
State Chaplin, Rev. Kuzierang Thou-i temoatsü meshia sarasadem aser Dr Nicky Kire, Minister of Forest & Environment, Neikule Doulo Chairman ENABLE aser Kapochu Naleo, GS NAPAD nungeria o tatsütsü jembia liasü.
G.Rio school, Tabitha Enabling Academy, Jo Foundation Inclusive School aser ENABLE Differently nungi tanurtemi ken tena liasü.
Sentong nungsa shilem agir tanur ajak, tesayurtem aser tsüraburtem ajak nem Khristmas nüngtem nung sempet lema agütsü.