Tsüngremi pelashishia agütsüba meimer – 2 Kor 9:7

Khristantem ajak dang asüngdangba tasüngdangba kaji ter shilemji ozüng süa akangba ka asü? Ibai tenüngsang maliba mulungjang nungi asüngdangba ka lir. Tsüngremi asenok nem moatsüba ajak nungi tajemtiba agütsübaji, ter shilemji lir. Ibai Pa tenüng asangba aser tushiba lir.
Abrahami ozüng maliba mapang ter shilem agütsü (Lipok 14:20). Pai pasasa mulungteta tenüngsang agütsü. Yakobi Tsüngrem dang nangzük, “Nai kü nem moatsüba ajak nungi ni atangji Ne nem noklang nung ter Ne nem agütsütsü” (Lipok 28:22).
Kodang Israel nunger kin ka ta jateta aküm peisasa mulungteta agütsüba iba mapa ya ozüng aküm. Mosa ajanga agütsüba ozüng jagi ashir, “Aser linük ter shilem ajak, ali nungi adokba tejang süshia, mesüra süngdong tejang süshia, Kibuba meyong lir: aji Kibuba asoshi temeshi lir” (Lev. 27:30).
Yisu mapang nung tezülurtemi aser Farisitem tilatiba nungia ter shilem agütsü, saka parnoki ochi, taochi aser tamang toktsü. Anungji pai tershilemji temeim mulungsentsü ajanga agütsütsüla ta sayu (Matt. 23:23).
Yisu asüba nungi asenok tezüngzüktepba tasen kar aser iba tezüngzüktepba kübok ozüng süa ter shilem agütsütsü tesayuba mali kechiaser Tasen Tezüngzüktepbaji “tajungba” Tezüngzüktepba lir, tajung ka agütsüyim sayu: pelashishia agütsüba (2 Kor. 9:7). Mulungsoa agütsüba (2 Kor. 8:4). Tali agütsüba (2 Kor. 8:3). Anungji tanü Khristantem asoshi ibai tenzüka inyakba tesem tajung ka lir saka iba nungji aintsüla. Asenoki ibai maneni agütsüpet agütsütsüla. Jenjang medaki asenoki agütsütsüla (2 Sam. 24:24).
Sensaker maitsür kati la akaba agütsü (Mk. 12:41-44). Maryi la akaba shiloktsü (Mk. 14:3-9). Yisui tenaprongla tenüng asang. Ter shilem nung akaba ajunga dangi aobaji Khristan ainba nung shilem ka lir. Shirnoki parnoki bena aruba nung ter shilemjia magütsür, Tsüngremi parnok dang auer ta ajar (Malaki 3:8).
Küm tesadang tema aor, ner kibongi ter shilemji magütsü arua lira, tanü tenzükang. Ne ita sen agizükli intokttsü tetenzük. Kidangi bener arur sarasadema Tsüngrem shilemji tama balaka agitetta yuang aser ner kibong nüngdaktem aliang. Ibai yimya tajung lir.