Tsüngremi takhümbangba

Aser Jabezi Israel Tsüngrem dang jaa ashi, oh, nai ni moajang aser kü litsü ulushidakjangma, aser ne ket kü den liangma, aser ni mejashitsüsa nai ni timtem nungi sotangma! Aser pai kechi asüngdang Tsüngremi mela. (2 Puti. 4:10).
Jabezi sarasadem nung tanabuba asüngdangbaji pa akhümbangtsü asüngdang. Tsüngremi Pa chirtem nem taküm nung temeten ajak agütsür külen asenok asoshi Pa mapa temejaji akhümbangtsübaji lir. Tsüngremi Pai shimtetba purtem nem maongka agütsübaji akhümbangbaji lir. Tsüngremi akhümbangba dak temaba jenokdak tuluji kechi alitsü? Tsüngremi anüngdang aser aonung Pa chirtem anüker (T. Ken 121:4). Pai manener mesüra memejanger. T. Ken 91 nung Tsüngremji tesüngmangtsü jenokdak ta ken züluri zülu. Pa asenok jenokdak tematiba lir. Shirnok Pa dak jenoka alir Tsüngrem tekai parnok atonger. Pa temeyongi mapang ajak nung parnok atonger.
Temoatsü agizüktsü tongtipang asüba amaji temoatsü amshitsübajia tongtipang lir. Takhümbangba meli-i temoatsü agizükbaji kidang rongsen agi sünga nangtena yur kishi mali ama asütsü. Jabezi Tsüngrem temoatsü agizüker Pa tawabangbaji nüngdak ta Tsüngrem dang pai sarasadem. Pa sarasadem ajunga agi Yisui nütsüngtem dang sarasadem sayuba, “Tamajungba nungi onok kümzükang” ta ashibaji dang liasü. Bendanga agüjatokba ama kecha tagi. Tsüngremi awabang nung dang ajak kümzüka yutet. Temeimba, temeimla asoshi aser Tsüngremi moatsüba ajak awabanga alitsü asoshi sarasademang. Yobi pa meketa atsübanga alitsü sarasademba ama anogo shia sarasademtsüla (Yob 1:5, 10). Tanü temoatsü nung pelaba jagi asenok sarasadem masüba taküm mekümdaktsüli aser asüng temoatsütem rakzüka bener modaktsüli.