Tsüngremmong sobaliba

Aortemi Tsüngremmong monga aruba ya akhi mapang Israel nungertemi Tsüngremi parnok aochiba aser kümzükba anogo mamatsü asoshi amongtsümong balala monga aruba amato lir. Tsüngremmong ya shi ango den chiyongtepa pelatepa amongba benjong ka dangbo masü saka kidangi Tsüngrem aru yongyaseta sarasadema amongba benjong ka lir. Tetezü Tsüngremmong mamongerbo Tsüngremi par ki ajanga mesüitsü, anungji Tsüngrem nungi temoatsü mangutsü ta tsüraburtem tangatetba liasü. Ibaji tanü tensa asenoki amongba benjongbentsü den medemdangra tamanger ajaki Christmas benjong metsüngareta amongba amai lir. Ibaji kodang asenoki mangatetlir, Tsüngremmong benjong amongba ya Tsüngremi memulungba among ka amonger amai asenoki bilemtsü, kechiyong iba benjongmong ya asen tsüraburtemi Yisu temeim osangtajung indang mangashiba mapang nungi monga aru. Ajisüaka, asenoki angatettsüsa tatishitsü ka amshitsüba kaji, tsüraburtemi amshia aruba yi marokji temenen masü saka yiji dang temenen lir, anungji yi adok agibo marokji meindoki jungjunga shidoker kasa marok nungji tzü aser mamatzü tajung yanglua ajemtsüa akok. Iba amaji tanü asenoki akhi tsürabur mapang nungi monga aruba sobaliba benjongmongtem ya mesamadaktsüi akhi limapur yimya nung masü saka tamanger yimya nung temoatsü ajak Tsüngrem nungi arur ta bilemteta amongtsübaji kanga tongtibang lir. Sentep mesüra senden ka nung Tsüngrem temeim aser temoatsü indang jembiba dang nungibo kasa Tsüngrem temeim aser temoatsü bilemteta kidang kinunger aser talisa chirnurtem den pelatepa benjong ka amongbajisa tajungba asütsü. Iba jagi asenoki asen chirnurtem dang aser parnoki parnok chirnurtem dang Tsüngrem akümtsübua alitsüba atema nenshia metetdaktsüba mapa ka kümadoker. Atangji, tanga asenoki moatsü aser tsüngremmongbo amonger saka akhi amato masü, telok kati sentong ka ayongzüka memongra, pei kidang kinungertem den mesüra züngartem denbo benjong mapang metetdakja aikati mamonger. Ashiko, iba jagi asenok tamangba nung tashimait akümer asütsüa akok. Tang asenoki Christmas amongba yagibo Tsüngremi asenok kümzükba temeim indang nenshia metetdaktsür dang ashi Tsüngrem nungi anguba temoatsütem indangbo mejembir. Item ama tesem kar nung asenok arogo nungertem asentenshia tangatetba kati arutsü nüngdaker. Asenok kibong aika nung kinunger külemi senteper kibong tekülem magir, anungji küm nung kenüa kinungertem külemi sendena sarasademtsü magidang küm süidaktsür. Iba amaji Khristan kibongbo Khristan kibong saka taküm tepiyong nung kidang kinungertem külemi longjemer sarasadem mesüdangba kibonga aika alitsü. Talisa, item ama kibongtem asoshi benjong mapang ya kinunger külemi mener Tsüngrem nem tenüngsang agüja sarasademba mapang ka asütsüsa arogoi Khristan sobaliba tasen ka tenzüktsüla. Aji oda, Tsüngremmong amongba anepdang ya tsüngtsüng temer kibong shia nung kinunger ajak longjemer sarasadem agiba sobaliba ka tenzüktet nungbo, shitakba Khristan pur Tsüngremmongji aji süla. Iba Tsüngremmong anepdangji kinunger külemi sarasademer külemi chiyongba sobaliba tasen ka tenzüktsü aser iba sülen inti sentep mesüra lokti benjong sentong ayongzüka alitsüa akok. Küm nung ken mesüra anabenbo Tsüngrem temoatsü aser Pa taochi bilemtettsüsa asenok sobaliba dak aketba benjong memongra, küm ishika lir külenbo asenoki Tsüngrem amadoktsü. Asenok sobaliba nung tajung kaji mapa ajak nung Tsüngrem tama südaktsür. Itemji  kodang asenoki  Tsüngrem nem tenüngsang agütsüba aser Pa dang temoatsü meshiba benjong monga benshidir, idangji tali jangjar aser angazüker. Tang asenok Khristan yimsü agizüker küm 150 ajungdang, item sobaliba tajungtemji asentenshia Tsüngrem dangi meyiptsü mapang tajung asütsü. Tsüngremi Tsüngremmong mapang aser teti Naga kin aser Aotsür Aortem moajangma.