‘Tsüngremmung Hornbill Festival’ asoshi mazüngi inyakteper

Mokokchung, July 30 (TYO): Aug 1 nungi 3 tashi Mokokchung Imkongmeren Sports Complex nung ‘Tsüngremmung Hornbill Festival Mokokchung 2018’ celebrating our roots omen nung ajemdaker amungtsü asoshi mazüngi renemdaki. Iba sentong ya state sorkar tetuyuba nung district administration den lokti balalai yaritepa ayongzüker.
Aug 1 nü, nikongdang 1:00 ako nung iba sentong Nagaland Deputy Chief Minister, Y.Patton ajanga tenzüktsütsü aser Higher Education & Technical Education Minister, Temjen Imna Along-i Tsüngremmung salem abentsü. Mezüng nüji nikongdang 5:00 ako nungi sobaliba sentong ka alitsü aser iba nungji Tourism and Art & Culture Advisor, Khehovi Yepthomi tetushi tejaoker ka ama adentsü.
Aug 2 nüji Tsüngremmung sentong nikongdang 1:00 ako nungi tenzüktsü aser iba nungji Nagaland Chief Minister, Neiphiu Rio tejaoker khudong asütsü. Inüji Urban Development & Municipal Affairs Minister, Metsübu aser Nagaland Chief Secretary, Temjen Toy IAS nati Tsüngremmung salem bener arutsü. Iba nikongdang 5:00 ako nungi Aor sobusolem balala sayuba sentong ka alitsü aser iba yangji Industries & Commerce Advisor, Imnatiba tetushi tesemdanger asütsü jaoka lir.
Aug 3 tatembang sentong nung PWD Minister, Tongpang Ozüküm tetushi tesemdanger ka ama jaoka lir. Sentong nung Law & Justice, Border Affairs, Treasuries & Accounts Advisor, Dr. Longrineken-i Tsüngrem salem abentsü. Iba nikongdang 5:00 ako nungi kentenmenü tetoktepba aser senpet agütsüba sentong ka alitsü aser yangji Mokokchung D.C, Sachin Jaiswal IAS tetushi tesemdanger asütsü.
Aug 2 nüji Ao Senden-i achayanga shizüngzü atsüba sentong ka alitsü aser ibaji anüngdang 12:00 ako nungi tenzüka Mokokchung Police Point nungi Imkongmeren Sports Complex tashi miyo balala miyoa atsür aotsü aser sentong agiba tesemji tonger külen ar atsütepba mapang ka alitsü, ta angazüker.
Anogo asemnü agitsü aliba sentong nungji tzükong trok den Sumi aser Sangtam kin aser Assam nungia kar densema telok balalai sobaliba yartsüngsanger balala ajanga shilem agitsü jaoka lir, ta angazüker.
Iba benjung nung jangratemtsü rongnung; school-tem tetsüng pasa agi football asayatsü, Ward-tem rongnung ar atsüteptsü, sobaliba asaya balala sayutsü, suruchiok tetoktepba, traditional aser modern yimya nung music tetoktepba ka alitsü, free style dance crew ta sür tsüngsangba ka alitsü, sobaliba sobusolem balala sayutsü, noksa tangok tetoktepba, game stall, food court, photo booths, sideshow, flower show, handloom & handicraft aser ano aika lir. Angazükba agi, Imkongmeren Sports Complex nungji süki (stall) tapu balala noklang dak tema lapoktsü.
Iba benjung dak sentakba nung ano Mopungchuket yimdak Süngkotenem awatsüng nungto angoh mesü tetoktepba sentonga ka ayongzüka lir. Tejangratemibo iba nungjia shilem agitettsü.
Sentong balala agidang tejaokertem amentsü atema gound nungji Aor yimya nung arju mesüka sabang ka yangludar.
Iba benjung nung asen lima aser bendanglen nungia lima penzür (tourist)-tem aika arutsü imlar, ta sorkar ketdangsür kati iba osangbener den jembidang lemsatep.
Aor benjung ka tanga benjung den meyoktepa amungba yabo tim masü, ta kibok nung, social media balala aser osang kakettem nung nisung aikati ola adokba angur, aji saka, renema akaba sentongji odang agitsü südi.