Tsüngremmung Hornbill Festival Day II osang

Aug. 2, 2018 nü Mokokchung nung shizüngtsü atsüer aruba mapang tangokba noksa nung angur.

Mokokchung, Luroi/August 02 (TYO): Ao kin nem ‘Land of Pioneers’ nüngja agütsübaji odang tapi agi agütsüba masü, otsüren repranger külen Aori Naga nunger tejakleni aniba nung shilem tulu agiba yong agütsüba lir; Iba o ya Nagaland Chief Minister, Neiphiu Rio-i Aug. 2 nü ‘Tsüngremmung Hornbill Festival Mokokchung 2018’ sentong Imkongmeren Sports Complex nung jembidang metetdaktsü.
Kohima yimtiba nung Hornbill amungba kisüng jagi teperi makümer, anungji district shia nung sakuku maongka agütsütsü nüngdak ta ajiteta mini-hornbill sentong ya Naga kin benjung balala amungba den külemi agitsü PDA sorkari lemtetba lir, ta pai ashi.
District balala nung iba ama mini-hornbill festival ayongba ajanga limapenzürtem aruba dang masü saka Naga nunger takar sobaliba wazüka ayuba den kija aser lokti balala lenmang aisü nung tajangzük angutsü imlar, ta pai ashi. Iba ama benjungbentsü amungba ajak ya website balala nung agütsüba ajanga asen sobaliba nüngtugu kümdaktsütsü, ta paisa shisem.
“Naga nunger tebilemtsü ya yimden tebilemtsü” ta GOI-i angateta Naga nunger putiotsüji balaka ta agizükogo, iyongji jembishinü (dialogue) balala tenzüka tanü tashi arudar. Anungji, asenoki asen sobaliba tajungtemji wazüka ayutsü kanga tongtibang, kechiyong iba ajanga dang asenokji tangar dang nungi balaka ta shisanga sayur, ta paisa ashi.
Paisa, Nagaland nung terenlok inyaka aotsüba maparen kar lemsatepdang, aiben Assam nung lendong timtem ajurudang district kar kanga okronger, anungji, iba timtem paitoktsü atema tekaratiba nung foothill road ya asentenshia inyaktsü, ta metetdaktsü.
Iba den ano train jajatettsüsa aliba tesemtem nunga railway sentakteptsüsa mapatong kar asayameyangdar, ta paisa shisem. Terenlok maparen balala tenzüka aodang timtem madoktsü atema ali kibur aser nüburtemi sorkar den amaliteptsü asoshi paisa mepishia liasü.
Dr. T. Ao nüngtem Dimapur nung football academy ka lapoktsü tebilemba lir, ibaji kodang mapa kümtetdir, Naga nunger saisapong luyim nung tajangzük jenti angutsü imlar, ta paisa ashi.
Taküm December ita tashi nung Nagaland ya ‘plastic free state’ ka kümdaktsütsü aser taküm 15th August Independence Day tashi nung Nagaland ya ‘open defecation free state’ sangdongtsü lir, anungji item maparen ajak nungji nübur teyaritep aser amalitep nüngdaker, ta paisa ayongzük.
Mokokchung Entrepreneur Consortium (MEC) teloki 2011-2018 tashi maparen balala takok ngua inyakba indang kaket ka Rio-i sayatsü.
Tanü Imkongmeren Sports Complex nung Tsüngremmung sentong metenzükdang, Ao Senden akhüm nung Mokokchung Town Longsa Senso Telungjem-i anir sobaliba ken den miyo balala miyoa police point nungi sentong agiba tesem tashi yimdong süa shizüngzü atsüer aoba ajanga benjung tali longsodakja liasü.
Mokokchung Town Baptist Arogo (MTBA) Pastor, Rev. Ponen den temoatsü meshia sarasademer iba sentong tenzük. Sentong nung Ao Senden Tir, M.Toshi Jamir-i tarur pelaa agizükba o jembi. Urban Development & Municipal Affairs Minister, Metsübo Jamir aser Nagaland Chief Secretary, Temjen Toy nati Tsüngremmung salem o tulu bener aru. PA to DC, Zülunungsangi Tsüngremmung ratet ashi aser Mokokchung D.C, Sachin Jaiswal, IAS-i melepzüng o jembia liasü.
Assam nungi yartsünger telok ana den Sumi kin, Sangtam kin, Watsü Mungdang aser tanga telok kari sobaliba ken aser yar tsüngsang balala ai. Ward-tem rongnung ar atsütepba tetoktepba nung Salangtem ward o Mongsenbai ward na final asayaba Salangtem ward-i koka liasü.