Tsüngsang Mopung (T.Ken 107:22-31)

Item tekongtemi tzüyim nung yipru mopung aliba sayur. “Kechiyong Pai melar, aser yipru mopung adokdaktsür koba agi iba nungi tzüsem adokdaktsür. Parnok anüngi atur, tanaben parnok tzüyim taroki alur: timtemba yong parnok tanela yimsa aor. Külen-külen i parnok naizür, aser yi pur ama mangmanger, aser parnok kechi mesayangi lir” (t.25-27).
Tzüyim yipru asenok taküm dangia arur. Kechi agi aji adokdaktsür? Khen khen tangar ajanga aji adokdaktsür. T.Mapa 27 nung Paul taküm nung yipru adokdaktsü kechiaser rong nung tanishirtemi Tsüngrem O nung mamang. Khen khen asenok tendangtsü aser yanglushitsü asoshi Tsüngremi adokdaktsür. Mathi 14 nung Yisui nütsüngtem tamang tendangtsü asoshi yipru tiyongi yok. Khen khen tashi mangaba ajanga asenok sasa yipru adokdaktsür- Yona ama Tsüngrem nungi jena aor aser Pa dangi tanaben anir arutsüba lenmangji yipru yoktsübaji dang lir.
Saka yipru tulutibaji Kalvary nung adok. Ghonda asem anüi tesangwa magütsüi mangadok aser Tsüngrem chir asenok asoshi temenen kümdaktsü, Tsüngremer yipru ajak aser o bendangba kangki nung Yisu dak adok. Pai iba yipru mopung adokdaktsü nung asenoki Tsüngrem dang ayimtentsü akok. Pai asenok taküm yipru nungi kümzüktsü akok mesüra iba ji ajanga anitsü akok, asenok nem nüngdak tashi agütsütsü aser ajungshitsü akok. Ken züluri nangzüker, “Pai yipru tesüngjem kümdaktsür, anungji iba tzüsem marakzüi lir. Idangji parnok pelatep, kechiaser parnok ajemajema ali; anungji Pai parnoki yongyaba tejennokdak ki anir aru” (t. 29,30).
Tanü nai yipru ajurur asü? Ibaji süngjemdaktsütsü Tsüngrem dang tashi aser tajungshiba asüngdangang. Aser angatettsü asoshi shisatsü meshiang, ibaji teindok tekümdaktsü.