Tsüngsem melena semtetba moja ka yangluogo

London, August 30 (Agencies): Tsüngsem melena semtetba moja ka yangluogo, iba moja ya semerbo tsüngsem tenüngdaktsü mali. Iba moja ya kanga tang tashi tait fabric, Dyneema agi yangluba lir aser iba ya saisapongdang-a moja o tsüngsem na küpdok semtettsü.
Dyneema ya lung nung soa aturtemi parnoki amshiba lisü nung enoka amshir aser ibai steel dang nungi 15 sü agi tashi taitba lir.
FYF (Free Your Feet) moja ya semer külen tzüa maiter. Iba moja ponglanglen rubber jang enoka lir koba ajanga ajemdakdang majudaktsür, ta Daily Mail-i metetdaktsü.
Iba ya asemba ajanga saisapongertem tetsüng yiru-yipong nungi kümzükstü.
“Asayartem saisapongdang tsüngsa amai pei tetsüng pongba pongba amshitettsü asoshi onoki iba moja ya yanglu,” ta footwear developer Dieter Hesch-i ashi.
Dyneema enoka yangluba agi iba moja ya kara meshisar aser tasemer kanga anisüngzükdaktsür, ta moja yanglur company-i ashi.
“Saisapong aika tsüngsa asayala lir saka yirutsü tsübuba ajanga tsüngsem semer asayar,” ta Hesch-i ashi.
Iba moja ya chura ka nung US sen 80 shi agi ayoktsü tebilemba lir.