Tsüngteper Amir Khan WBC nung tamakok angu

Las Vegas, May 8 (Agencies) : Las Vegas nung Mexico nunger tsüngteper mongin Saul ‘Canelo’ Alvarez-i Britain nungi tsüngteper Amir Khan round trok buba nung knock out süja WBC middleweight takok marok shilua benogo.
Pa knock out masü tsüngda Khan-i akhi ama kanga kara arakzüa aser yakyaka tsütepba ajanga pa points timba liasü.
Aji oda süaka pa second tesadang ka shi temulung magütsüba mapang champion, Alvarez-i teka tachijilen agi pa dak tsüngokja khen nung süchia yok, ta Honibarnü BBC osang ajanga metetdaktsü.
Arishi küm 29 tain, Khan-i ‘weight division’ ana ajangdanger tua Alvarez den tsüngteptsü jazükba ya akok asübo, light-welterweight world champion kati middleweight world champion akoker nisung tasembuba akümtsüba liasü.
Khan-i round ana tashi nung world champion sang koda mesüi kümdakja liasü.
Ano round tasembuba aser pezübuba tem nunga Khan-i arishi küm 25 tain Alvarez dak kanga kara mazüngi tsüng meso.
Ajisüaka round pongububa nungi Alvarez-i junga tsüngteptsü tenzüka round trokbuba nung Khan dak süchia tsüngokja takok angu.
Iba tsüngtep temer külen Khan-i twitter nung Alvarez takok tushia ashidang pai, “Ni junga lir,” ta lemsatepogo.