Tsüngteper mongin, Pacquiao-i tsüngteptsüren toktsütsü lemteter

New York, January 22 (Agencies): Philippines nunger tsüngteper mongin, Manny Pacquiao-i America nunger Timothy Bradley den taküm April ita toktepa tsüngtepba sülenbo tsüngteptsüren toktsütsü lemtetba osang ka metetdaktsüogo.
Küm 20 tsüngda nung 57-6-2 otsü yangluba den külemi, temang touzük shilem 8 tashi nung world titles angusang, Pacquiao-i World Boxing Organization (WBO) welterweight championship belt atema Bradley den US kübok Las Vegas yimti nung taküm April ita 9 nü toktepa tsüngteptsü renema lir.
“Bradley den tsüngteptsü renemba ya ni asoshi tatembangba tetoktepba alitsü. Tan tsüngtepba sülenbo ni ozü Philippines nüburtem bendanga agüja tenzüktsü alizüng yua lir,” ta arishi küm 37 tain Pacquiao-i metetdaktsü.
Philippines yimsüsür, Pacquiao-i taküm May ita 9 nü agitsü ayongba linük election nung takok ngua Senate menden ajangzüka par nüburtem tenzüktsü alizüng ayuba osang jangjaogo.