Tsüngteper Sarita Devi-i Zsofia Bedo madak takok nguogo

Imphal, January 29 (Agencies) : Nüburtemi kanga saklokla, tsüngteper L Sarita Devi-i Deobarnü Khuman Lampak Stadium, Imphal, IBC Fight Night nung Hungary tsür Zsofia Bedo madak ayong ayonga takok nguogo aser iba ya la asoshi mezüng pro-boxing takok lir.
Zofia Bedo-i Sarita menüngshia akoktsü amai tsüngteptsü jazük, ajisüaka Sarita-i ang meyiper la aliba tesem nung la sapurtem jakdang takok tulu angu.
India tsür tsüngteper rongnung ‘Iron Lady’ ta tenüng jaloktsür alila, Sarita-i, “Asian games nung atalokba to kanga tesasatsü ka liasü. Ni iba tatalokba tamajung kü shisatsü nungi khenyongi meyudoka adoktsüla aser iba tebilemba nung ni pro-boxer aküm. Tetsü ka atema tanur nungi pilar mama meyongdaktsübaji tenlaba tulutiba lir. Ni iba anogo atema iba tenlaji agütsü,” ta ring telung nung lar jabaso arishi küm 3 dak azülokdang ashi.
Zsofia aser Sarita na tsüngteptsü sangdongba sülen nungi tena tsüngda o agi kanga toktepa aruogo.
Hungary tsür Zsofia-i, “Ni Sarita ji ano nüktzü aludaktsütsü,” ta shia liasü.
Ajiüsaka tena tsüngtep dang Sarita-i kanga sashia atsüngba nungi jenbutsü atema Zsofia-i la dak mapang shia oa azüloka liasü.
Zsofia pro-boxer kümer 59 ben tsüngtepa lir, ajisüaka tsüngtep tenzükli nungi tan mezüngsüa pro-boxer ka ama tsüngtepla, Sarita-i tajungba tsüngtep aser tanabuba round nungbo Zofia dak anaben tashi laoa atsüng.
Zsofia-i la jazükba aser o agi kanga mejungi lutsüba ajanga hopta ana tashi training tasak agir aruba sülena Sarita-i lar jabaso den majurutepi tsüngteptsü telemtetba agi.
Round asembuba nung lai akoktsüsa temulung lemteta tsüngtepba sülen, Sarita-i la den tsüngtepla teti asoshi ajem ajema kümdaktsütsü asoshi meranga tsüngtep.
2014 Glasgow Commonwealth Games nung Silver medal angula, Sarita-i la tajungba ta sayutet aser tsüngteper mongin ka akümtsü tetemsü ta kuli tejangja sayuogo.