Tsünüsenbongtsü belenba menokdangtsüla: Y Kikheto Sema

Dimapur, April 18 (TYO): Aluyimba dak sendakba maparen inyaktsü temelaba agüjaka, yimtsüng ketdangpurtemi tenokdangba agütsür, ta Agriculture Production Commissioner (APC) aser Commissioner & Secretary, Agriculture, Y Kikheto Sema-i ashi.
Honibarnü Hotel Saramati nung osangbener den jembidang Kikheto Sema-i ashiba agi, “village councils aser volunteers-i tsünüsenbongtsü bener mesenzüdaktsüba osang angazüker. Talisa talirtema yimtsüngi maitdaktsür.”
Kikheto ya Special committee on Covid-19 Dimapur nung züngsem ka lir aser paisa ashiba agi, “corona virus anema raraba mapang tongtipang ka nung asenok ajak külemi longjemtsüla. Tang ya kati ka dak tai tongloktsüba mapang masü saka nüngdakbapur nem pei tajungtiba agi yaritsüba mapang ka lir.”
“Nagaland state nung tsünüsenbongtsü belenba mapa nung tenokdangba magütsütsüla, kechiyong India sorkari iba mapa inyaktsü temelaba agütsüogo aser iba dak sendakba nung tetuyuba aika agütsüogo,” ta paisa metetdaktsü.
Tsünüsenbongtsü belenba maparen nung tenokdangba mesüra timtem agütsürtem ozüng tapet agi merenshitsü, ta Kikheto-isa ashi.
Naga entrepreneur temi aluyimertem den sendakteper parnoki tsünüsenbongtetbatem district ajungalen belenshitsüla, ta paisa ayongzük.
Osangbener senden nung Agriculture Director, Dr. R Elithung Lotha-ia ashiba agi, “department of agri and allied sectors renema lir aser district administration den yaritepa tsünüsenbongtsütem local markets dangi yoktsü.”
“Tsünüsenbongtsü belenba noktangra, iba ajanga aluyimertem timtemba dang masü saka tsünüsenbongtsü ajema akümtsü aser chiyungtsü peria mangutsüsa khuret ajurutsü. Asenoki tangar dang meimla, asen sasa peria tsünütettsüla” ta Agriculture Additional secretary, Temsunaro Aier-ia ashi.