Tsürabur mapatem wazüka ayutsü arju ki ka asü

Mokokchung, April 24 (TYO): Tanü lanurtem aikati akhi asen tsüraburtemi amshiba kisen aser akiarutsü teka mapa tapu balala nüngjatem memetet aser itemji asenoki wazüka meyura meilongi ajakji samaa aotsü.
Anungji, asen tsüraburtem mapa wazüka ayutsü nükjidong yur Ungma lushi nung Arju/Ariju ki ka süa kar.
Iba arjuji akhi asen Aori asüba yimya nung kanga junga süa kar. Jangratemtsü kaji; iba arju telung nungji akhi asen tsüraburtemi amshia aruba kisen tejen; meküm, langpang, molok, süjong, tsükden, sali, auso, tzüshi, alipo, pongdangsemtsü, tzüpong, süngko, sangta, tzükang/chikang, ketsü, chii/tsü, melakang, chikok-chisang, kota, au marok, jung, tzüshikhu, shilangtsü, mi apoba mesü, kirdangtsü aser akhidang amshiba osettsüset tapu aika angutsü.
Tanü asüng joko lanurtemi iba tsütsü temulung magütsür, iba amai dang ora tarutsü nung asen takar sobaliba samatsü, anungji, asen tsürabur mapatem wazüka ayutsü nükjidong nung ibai yangluogo, ta arju kibur Ungma nunger tsürabur ka den iba osangbeneri jembidang ashi.
Iba ya ni ajangzüktsü atema yangluba ka masü saka museum ka ama asen tetsü tebou mapatem wazüka ayutsü tejangraba nung yangluba lir, ta paisa ashi.
Tarutsü nung iba ajanga lanurtemi iba luyim nung shisa tarok bushia yimya balala nung tsürabur mapatem rizünga (document süa) ayutsü junger, ta paisa lanurtem nem inyakdaktsünüba wadang ka lemsatep.
Akhi tsürabur mapang arju nung ya ar den jutepa raratsü nok nü maparen angazükba dang masü saka kati ka den akhümtsübutep, yimyatsüya, yimten yimli, kishikina den yimjung mapa, kin kidong aser otsüolem aser teka mapa jenti angazükdak reju liasü. Tanübo asenoki yimyaji mebenshir saka item mapatemji tarutsü putu atema wazüka ayutsüla, ta paisa shisema liasü.
Akhi asen Aor yimya nung arju asüba ajinüra iba rejuji Ngaza ta ajaba Settsü-Lumami-Kohima lenjem len kübok angutsü.