Tsürabur R.Lisen alima nungi pilaogo

Dimapur, May 04 (TYO): Molungyimsen nunger Jangpetkong Assembly Constituency nungi mezüng MLA aser Mokokchung Town Baptist Arogo nung taoba sannüker, Wb.R.Lisen Ao yasüng Dimapur nung Zion Hospital nung anepalua lia 11:00 ako shi nung alima nungi pilaa ogo. Pa arishi küm 84 liasü.
Asür tsürabur R.Lisen Ao ya November 27, 1932 anogo nung aso aser pa B.Th azüngba lenir ka liasü. Pa lanur asüba mapang nungi lokti lenir ka liasü. Ibayongji, 1959 küm Ao Theological Association pa mezüng tir sür tentet aser 1960 küm Changki yimtak CE mongdang alidang pa tir liasü. Pa ya 1961 küm 2 buba Asian Baptist Youth mongdang Tokyo, Japan nung alidang oa adenba lenir ka liasü. Pai Philippines, Hong Kong, Thailand, Myanmar aser India tesem balala nung sayutsüngia jaja.
Pa ya alima tensa mapang agi yimten aser Arogo na prongla nung shilem agia nübortem tenzüktsüsa aküm. Anungji, 1964 küm pa Jangpetkong Assembly Constituency nungi mezüng MLA aküm aser iba sülen 1968 küm nungi Mokokchung Town Baptist Arogo nung sannüker liasü. Ano, iba sülen 1974 küm Mokokchung Town Assembly Constituency nungi MLA aküm. Pa tambur kümer külena kaket ken o nung temulung agütsüba nisung ka liasü.
Pai America nunger sayutsüngirtemi inyakba mapatem aser züluba kaket ken o mesamadaktsüi anepalua benden aser meyipzüka menünger nübortem nem lemtsü.
Asür lenir aser tsürabur R.Lisen Ao alima nungi pilaba osang angashia, Nagaland chief minister, Wb.T.R.Zeliangi mangyim jashi lemsatepba osang ka metetdaktsüogo.
” Pai nübortem meimba ajanga arogo aser yimten na prongla nung takok ngua tenzüka aruogo,” ta paisa ashi.
“Asür R.Lisen Ao ya Tsüngrem o azüngba nung aser Naga yimten nung samanirsa nübortem asoshi bendanga agüja inyaka aruogo. Pai Tsüngremi mulungba nung lokti aser nübortem asoshi temelenshi bener arutsütsü tangatetba nug inyaka liasü. Pa ama ka asübaji Naga nunger ajak asoshi takoksa lir,” ta Chief minister-isa tesasaba o ka metetdaktsü.
Asür R.Lisen Ao ya par chir 6 den semchir 7 toktsür iba lima nungi pilar. Pa den asüpila sentep sentong Brehostibar anepdang 9:00 ako nung par kidang Aongza mepu, Mokokchung town nung alitsü aser pa Mokokchung town leper nung aremtsü.