Tsürabur Yashikala asüba mangyimer

Dimapur, October 20 (TYO): NPF Tir, Neiphiu Rio-i, taoba mapang Chief Secretary aser Minister, asür N.I Jamir kinüngtsü, Yashikala (arishi küm 97) asüba osang angashia mangyim lemsatep, ta tanü NPF Press & Information Cell-i sangdong ka nung metetdaktsü.
La kinüngbu, asür N.I Jamir 1996 küm süogo. Yashikala ya Longsa yim nungi lir aser la ya Parliamentary Secretary, Social Welfare, Merentoshi R. Jamir tetsü (otsüla) aser taoba mapang Chief Secretary, Alemtemshi Jamir tetsü lir.
NPF Central aser lenirtem ajaki asür kibong den mangyim lemsateper, aser Tsüngremi parnok nem iba mangyim koktettsü atema tashi agüjang, aser asür tanela tesünep nung anisüngzükdangjang ta sarasademtsür, ta sangdong nungsa shia lir.
CM: Ano külen Nagaland Chief Minister, T.R Zeliang-i sangdong ka ajanga, “Asür N.I Jamir kinüngtsü, Wt. Yashikala Jamir mapang tatsüka shirangba sülen yasüng 4th mile, Dimapur nung lar kidang asüba osang angashia aoksar,” ta ashi.
Asür Aonungshi aser Tayonglepla Longkumer na jala, asür Yashikala Jamir ya 1918 küm April 9 nü aso. La Impur Mission School nung azüngba sülen 1943 küm asür N.I. Jamir den kibong akum.
“Iba ama mangyim mapang nung ni aser ozü kibongi asür Yashikala Jamir’er chirnurtem, semchirtem aser kinungertem den mangyim lemsateper, aser iba takoksa koktettsü atema Tsüngremi parnok nem tashi aser tesünep agüjang ta sarasademtsür,” ta CM-isa ashi.
ASTD: Asür N.I Jamir kinüngtsü, Wt. Yashikala mapang tatsüka shirangba sülen October 19, 2017 nü Chekiye village, 4th Mile Dimapur nung asüba osang angashia Ao Senso Telongjem Dimapur (ASTD)-i mangyimer, ta tanü ASTD Tir, Supu Jamir aser tongti tezülur, C.Onen Walling nati sangdong ka nung metetdaktsü.
“La ya tangar dang nungi balaka tetsü ka liasü, aser asen state tentetba mapang lai tongtibang ketdangser ka tasü itta nungita aruogo. Lai la akumli piyong tenzükba mapa tajung atema ASTD-i pelar. Onokisa asür kibong züngsemtem den mangyim lemsateper aser asür tanela tesünep nung anisüngzükdakjang ta sarasademtsür,” ta sangdong nungsa shia lir.