Tsüraburi tasen achi aser chirnur tepo mejemer

~ L. Kika Pongener.

Ezekiel-18:2. “Tsürabur-i tsükmenatsü tasen achi aser chirnur tepo mejemer”. Ezekiel ainkar-i Israel nunger dang shin-baji kanga dang shidak lir. Tetsü-tebou-i tsükmenatsü tasen chira semchi-semnur tashi tepo mejemtsü. Tetsü-tebou-i temenen benshira iba atakatem temenen jagi par semchi-semnur tashi atakatemtsü. Aji oda, Israel nungertem-ia parnok tsüraburtemi temenen menaba tai temenen bilemteta kukua ajep. “Onok tsüraburtemi temenen mena aser joko mali; aser onoki parnok tai temenen khu abener” (Aiatai-5:7). Israel purtem Tsüngremi kinu tanur ka anepaluba amai anepalua meima alar tia jenjang nungi anitet. Ijip lima nung Farao chuba kübok kanga dang ala-ashia timtema aliba tia nungi Tsüngremi ninang mochitsü aser mamatsü yima aliba Kanan limai anir adok. Parnoki meinyakba sungjanglijang, metsünuba aonsotsü chia-jema lidaktsü, parnoki meyangluba ki nung parnok lidaktsü. Ajisüaka, kodang parnok jenjang junga aküm, linük nungji takar küma ali, parnoki Tsüngremi parnok alar tia nungi anitetba-to ama-adok aser süngyanglu külema apuso. Anungji Tsüngremi parnok dang kanga jashi, “Kodang Israel tanur ka liasü, idangji ni pa meim aser Ijip nungi kü chir aja. Ni parnok tali jali, parnok ni nungi tali oadokli asü, Baal-tem dang parnoki tetepsetba tenla aser süngyanglutem dang tenla” (Hosea-11:1-2). Parnoki Kibuba Tsüngremi parnok alar jenjang nungi iba tashi ajungket ta mebilemtet, saka parnok sasa alir ama mezümeküma Tsüngrem sentok. “Kechiyong Israel-i pei teyanglur ama-adok aser chuba kitem yanglu, aser Yihudai atsü atsüba yimti jenti kümdaktsü; saka item yimti-tem madak ni mi yoktsü aser aji agi iba nübur kitemji meyoka-adoktsü” (Hosea-8:14). Oda oda lia lia Israel-purtemi parnok yimsüsüba bangdak nunga Tsüngrem aküm metsübui küma-adok, Tsüngrem dang asüngdanga yimsü asütsü melena süngyanglutem dangang apudaka külemtsü apuso. Tsüngrem dang asüngdanga yimsüsür aser tongtipur shimtsü melena Tsüngrem dang nungi parnok temetetba shisatsü-ang tuluba kümdaktsü. Anungji kibuba Tsüngrem kanga jashi, “Parnoki chubatem shim saka aji ni ajanga masü, parnoki tongtipur shim, saka aji ni memetet ” (Hosea-8:4). Aji oda, Israelpurtemi yimten yimsusuba bangdak nunga Yihova Tsüngrem masü, saka sungyanglutem-ang kibur kümdaktsü. Anungji Zedekia chuba mapang alima kin ajaki benzüa aliba Yirusalem tamaren yimti, Babelon nunger yim-maker arua aoyi küma tepsatsü aser Yisusalem jara anüng tonga atsübanga aliba ajunga mi agi rongdoktsü. “Aia nisung sünga aliba yimti-to, koda rongjenseta mena lir !!! Kin rongnung la tulu aliba-to, amitsür mesüka küma lir !!! Yimti rongnung chubatsür ka aliba-to, koda tayimer ka küma lir” (Aiatai-1:1).  Zedekia chuba-i pa tenüki ngua par chirtem tepset, aser Zedekia chuba tenükjang arokdoktsür yinzü agi alener Babelon-i pua bener ao (2 Chuba-25:6-7). Yihuda nungeri Tsüngrem ama-adoker aibelen bayong Tsüngremi parnok  yamaji merenshi. Yihuda nunger alima kin ajunga matsüngdang tansütsü kin ka aküm.