Tsüraburtem mangdang wazüka ayutsüla: Dr. Longri

Mangkolemba, April 07 (TYO): April 7, 2016 nü Senden Salang, Mangkolemba nung Khar Senso Telongjem (KST), Mangkolemba Hon Jubilee ‘Renemshidi’ omen nung mungogo.
Iba sentong nung jembidang tongti tejaoker, DAN & NBRM Chairman, Dr. Longrineken-i KST dang ajemalua pei mezümeküm intoker tamalen tsüraburtem mangdang wazüka ayutsüla aser asentenshitsüla, ta ayongzük.
Paisa, lokti tajungba akumtsü atema mapa inyakba sobaliba benshitsüla, ta ashi.
Iba jubilee nung tetushi tejaoker, Mangkolemba ADC, T. Imtiwapang Aier-i Jubilee mungertem dang süngdonglidong aser shiruru wazüka ayuba nung shilem agitsü ayongzükba den külemi nüburtem aser tarutsü lanu puto tajangzük angutsü atema jila temeket wazüka ayutsüla, ta ayongzük.
Iba sentong ya Sunep T.Walling lenisüba nung agi aser Khar Village Council Chairman, Japukong Union Tir aser Changkikong Union, MBA unit nungia o tatsütsü jembia liasü.
Sentong nungsa Mangkolemba Khar Student’s Union-i Jubilee naklo ken aten, Mangkolemba Khartsür Telongjem-i sobaliba ken ka aten, Tzüdilong aser Kinaren nati sangro ka azüng, KTSM Tir, Supong Walling-i lokti pelaa agizük aser GJPC Convenor, Imjung Longkumer-i Golden Jubilee Planning Committee (GJPC) osang zünga metetdaktsüba den külemi tepela anküp o jembia liasü.
Wb. Nungshilepden Jamie aser Kr. Kilentula Jamie nati Hon Jubilee otsü zülua liasü.