Tsüraburtemi tanurtem den Ao oshi agi jembitsüla : ASLB

Ao oshi kümzüker, ajungkettsür aser renlokdaktsürtem (abelen nungi-) Prof.A.Lanunungsang, Wb.I.Temjen Tzüdir, Rev.C.Walu Walling aser Dr.Pangersenla Walling nungertemi tanü Dimapur nung Ao oshioben nükmen aser zülumen jangjashiba sentong nung jembidang agiba noksa ka yangi angur. ( July 25, 2015.)

Dimapur, July 25 (TYO) : Oshi ya tsüraburtemi pei chirnurtem nem agütsütsüba senti senmang ka lir, anungji ibaji mesamadaktsüi tajungba tajungba küma renloka aotsü asoshi tsüraburtemi pei tanurtem dang Ao oshi agi nendaknendaka jembitsüla ta Ao Senden Literature Board (ASLB) nung mendenbuba aser Nagaland University nung Pro Vice Chancellor, Prof.A.Lanunüngsangi metetdaktsü.

Pai iba o ya tanü Dimapur nung Dimapur Ao Lanur Telongjemi ayongzükba ” Oshioben aser Zülumen Jangjashiyim” sentong nung jembidang metetdaktsü.

Paisa ashiba agi, Ao oshi ya University nung sayutsü sentong nung enokogo aser joko Fazl Ali College nungbo Ao oshi sayur tesayur Assistant Professor ana lir aser taküm 2015 küm Ao agir kaketshir ajak agi 56 lir. Fazl Ali College, Mokokchung nung Ao oshi ya yaküm 2014 küm nungi sayur aser yaküma Ao agir kaketshir 26 liasü.

ASLB mendenbubaisa Ao oshi mesamadaktsüi renlokdaktsütsü asoshi Aori Ao oshi maaki jembitsüla aser akok tashi Aor tenla kidang sentep nung Ao ken dang atentsüla aser Ao ken, sangro, jilushi aser shisaotsü tasen tasen bushia mejemtsüla aser zülutsüla ta tayongzükba ka agütsü.

Tang Tenydie oshi yabo Nagaland nung college 16 nung agidagi, anungji item ajak nungji sorkari tesayur shima lir, anungji, asenoka parnok amaji pei oshi angazüktsü jangratsüla ta ASLB mendenbubaisa metetdaktsü.

Ao kaket keno zülurtem Dimapur nung teimba lir, anungji Dimapur nungi tenzüka Ao oshi jembitsü aser angazüktsü tejangraba adoktsü asoshi sentong kar yanglua tenzüktsüla ta paisa metetdaktsü.

Iba kasa sentong nung taoba ABAM Literature & Education Secretary, Rev.C.Walu Wallingia oshioben aser kenozülu jangjashiyim nung jembidang,  ” Kohima, Dimapur aser Ao lima ajanga orr aliba yimtitem nung Ao o kisüng jembitsübaji tanü putu nungbo tamashi ta karibo bilemtsü südi. Ajia maitsüli, yongjia shir kin kidong südir süaka, pei tetsümeli mangazükba mesüra memetetbajibo shiururu denang saku ta tip külen nungibo ratettettsüa akok,” ta metetdaktsü.

” Govt. College Dimapur nung danga süngla Aotsür Aor kaketshir 300 dak tali lir ta angazüker, süra item jagi tetsümeli  agitsü mulunga ali asü mali ? Mesüra Dimapur nung class 12 tashi lapoka aliba school-tem nung Aor jala jabasotemi tetsümeli agitsü jangrar mejangrar ?” ta Rev.C.Walu Wallingisa Dimapur nung aliba Aotsür Aor lanurtem ayongzüka ashi.

Kasa sentong nung ” Oshi Nükmen” onük nung Nagaland University nung tesayur Dr.Pangersenla Wallingi jembidang, “shirurubo tasodangyongi oshi shir asor ta ashir saka nisungbo sor dang oshi angazüker,” ta metetdaktsü.

Laisa ashiba agi, akhidang nungi English oshi zülumen liromedema amshitsü asoshi parnok rongnunga aiben mangatettep adok saka parnokibo iba jagi par oshi rajang mekümdaktsüi renloka odaktsütet. Aji oda, tanü tashi English oshi nunga olasü ama madokba olong aika lir saka itemji parnoki agizüka amshitetter. Oshi kecha nunga noklang nung noklang olasü ama zülumen adoka mali,” ta laisa ashi.

“Oshi bushia züludang oshi bushiri oshi jembiri kechi koma jembir aser parnoki kechi shitak ta bilemer iba ren nung zülutsüla,” ta Dr.Pangersenlaisa metetdaktsü.

” Asenok tsüraburtemi asenok asoshi Jungliyimti nungi bener aruba senmangji hon masü saka oshi lir, anungji asenok asoshi asen oshiji senti rongsen,” ta laisa metetdaktsü.

Iba sentong tetenzüklen ASLB tezülur Wb.I.Temjen Tzüdiri  tang tashi nung ASLB ajanga inyaktetba mapatem aser Ao oshi tensenyim indang rasaa metetdakja liasü.

Iba kasa sentong nung LBW telok aser Wb.Tiameren Aier nungertemi Ao ken tetezü aketba kensü tajung agi telok mulung ayongzüka tena liasü.

Iba sentong nung adenertem aser teyarirtem ajak dang pelaba o Dimapur Ao Lanur Telongjem (DALT) tir Wb.K.Longrii metetdaktsü aser DABA nung Associate pastor, Rev.Maongi sarasadema sentong tenzük aser DABA nung Christian Education Ministry nung Director, R.Asenla Jamiri sarasadema tembang. Iba sentong nung Wb.Moasünep menden liasü.