Tsuremmen Baptist Arogo nung Fathers’ School aka

Dimapur, Luroi/August 28 (TYO): Tsuremmen Baptist Arogo ya ABAM nung züngsema aliba arogo ka lir, koba Mokokchung district nung Assam den arrtsü nung lir. Iba arogo nunga Duranno Fathers’ School kanüa tenzükertemi sarasadema bilemdanger Dimapur Ao Baptist Arogo (DABA) dang teyari meshi. Ajioda DABA-i mapang meindoki teshiemtet nübur tesayur Rev. Imli aser Rev. Kika den staff ana iba school nung nüngdakba oset tabensa bener arua August 1-4, 2019 anogotem nung temoatsü aser takok nung mungtetogo.
Iba asoshi DABA dang Tsuremmen Baptist Arogoi kanga pelar, ta pastor B. Atoba Imchen-i sangdong ka ajanga ashi.
Arogo/yimtsüng yari iba Father’s School nung tebutem parnok 28 tena liasü. Parnok rongnung arogo tenzüker, yimten yimsüsür, school tesayur aser kijung kanurtem dena liasü.
Iba school agiba sülen tekülem kidangi marui alirtem arur, chia-ajemba nung mazüoki alirtem taküm melenshi aser kibongtem nung kinungtsü aser chirnurtem den mapang tajung agi tenzükogo, ta pastor ajangasa ashi. Maneni tekülem sentep agiba mapang parnoki ajangshiba temoatsütem amangbapur den kuli süa arudagi, anungji ozü arogo asoshi amangbapur ajaki sarasadem nung yariangma, ta kasa sangdong ajangasa ashi.