TTWO-i Clean Election shisatokden ayongzüka agi

Dimapur, October 20 (TYO): October 19, 2017 nü Tsiepfutsiepfhe Women Organization A.G colony-i Clean Election indang shisatokden ka ayonga agi.
Sentong Model Christian College Auditorium Kohima nung ayonga agi aser omenji “Role of Women in clean election” liasü.
Shisatokden nung Deputy Director ATI, Kohima, Dr. Hovithal Sothu-i o jembidang, “asen vote-ji Tsüngremi agütsüba temeden ka lir, anungji asenoki asen vote mayoktsüla mesüra tangar indang malizüktsüla” ta ashi.
Asenoki vote agütsübaji tangar dang meshii miima ayutsüla, ta Dr. Hovithal-isa ashi.
Naga nunger telongjem melii loksaa aoer aser asenok longjemtsübaji tetsü ka indang mapa lir. Tetsütemji temeim adokdak aser aria bilemtsürtem lir aser tetsü kati kibong aser loktiliba nung shilem tulu agir. Anungji election mapang tetsütemi Tsüngrem dang tashi meshia mapa inyaktsüla aser Nagaland nung election tim aser ochishia agitettsü atema sarasademtsüla, ta Dr. Hovithal-isa shisem.
Sentong nung mendenji Fin. Secy, TTWO, Mrs. Rhichevinuo liasü, Mrs. Atoli Kathy-i temoatsü meshia sarasadem, TTWO President Mrs. Talipokla Ao-i tesentepertem pela agizük aser Retd. Director Horti Dept. Mrs. Watila Jamir-i tajungshi o jembi.