TU nung bendanglen nungi kaketshirtem arua züngdaktsütsü asoshi sentong lir

Agartala, May 31 (Agencies): Tripura University (TU)-i bendanglen nungi kaketshirtem iba university nung züngdaktsütsü asoshi jenjang tajungba agitsü merangdar. “Bangladesh nung kaketshir aikati Tripura university nung züngner. Onoki Bangladesh nungi kaketshirtem aika puatsü asoshi sentongtem yanglutsü,” ta Vice Chancellor Anjan Kumar Ghosh-i Mongolbar nikongtsütsü ashi.
Pai ashiba agi, tang Bangladesh nungi Tripura university nung parnok 13 züngdar. “Onoki Bangladesh nungi kaketshir ano parnok 20 yakta züngoksemtsü asoshi imlar. Onoki ano Myanmar, Nepal aser Bhutan nungi kaketshirtem iba university nung züngoksemdaktsütsü asoshi merangdar,” ta paisa ashi. Ghosh-i ashiba agi, university-i tribal oshi balala ajungkettsü nükjidong nung post graduate, degree, diploma aser certificate course tem tenzükogo.
Oshitem rongnung Kokborok, Mizo aser Garo densema lir. Tripura University nung Chancellor maliba ajanga 2013 nungi tenzüka tang tashi nung Convocation khen danga agia mali, ta Ghosh-i ashi.
Kasa mapang nung University Grants Commission (UGC)-i Tripura University densema central university 10 nung ‘special audit’ agitsü asoshi telemtetba agiogo. Iba audit ya item university tem nung senotsü ketdangsüba, university maparen balala ketdangsüba aser shisatsü agütsübaren nung onük balala asadangtsü asoshi lir.
Tripura university ya 1978 küm amenlok aser 2017 küm central university ka aküm. Tang iba university ajanga course 42 agütsür.