‘Tubelight’ film nung Salman-i Zhu Zhu den shilem agitsü

New Delhi, August 16 (Agencies): International actor aikati Bollywood actor, Salman Khan sapur aser Kabir Khan indang film tasenba ‘Tubelight’ nung Salman den külemi shilem agitsü alila China tsür actress, Zhu Zhu-i pa den külemi shilem agitsü jangrar.
Osangbenertem den jembidang Zhu Zhu-i, “Salman Khan den külemi inyaktsü maongka anguba atema ni kanga pelar. Ni pa indang film tem reprangogo aser pa sempet ji ni kanga nükshir,” ta ashi.
Laisa, “Kü taküm nung ni ano tajangshiba tajung ajurutsü ta ni imlar,” ta ashi.
“Kabir ya film yanglur tajung ka dang masü saka pai teti pa film tem nung meimchir meimba aser sensakertem meimba indang sayar, aser ibaji alima nung alir ajak den sentaktepa lir,” ta laisa ashi.
Iba film atema Kabir-i Hong Kong, Beijing (China) aser Los Angeles (USA) nung auditions agia liasü aser pai, ‘Ni khenyongi Zhu Zhu saloka akum. Lai screen nung shilem junga agir aser la actress tajung ka lir. Screen nung Salman tena kanga putepa adoktsü,” ta ashi.
‘Tubelight’ film ya Leh aser Ladakh nung tangok tenzükogo. Kabir aser Khan nati ‘Ek Tha Tiger’ aser ‘Bajrangi Bhaijaan,’ film nunga külemi inyaksema liasü, aser film anaprong takok kanga junga nguogo.
Kabir-i Instagram nung Salman-i ‘Tubelight’ nung shilem agiba mezüngbuba noksa lemsatepogo, kong Salman-i sepai süoshi semer prangpong ka bener adoker.
Iba film ya 2017 küm Eid benjung mapang sayatsü sentong lir. Kabir-i direct asüba aser Neelesh Misra-i züluba film ya Salman aser Kabir Khan nati produce asür.