Tuensang ADC-i Ward lenirtem den shisadokden senden amen

Tuensang, Rongchii/April 14, 2020 (TYO): Tuensang, ADC, Ajit Kumar Verma aser SDO (C) Tuensang, Shelly Khatery nati April 14, 2020 nü ward lenir ajak den CKS Hall, Tuensang nung shisadokten senden ka ayongzüka agiogo, ta sangdong ajanga metetdaktsü.
Senden nung Tuensang, SDO (C) Shelly-i, iba ama tensa ka nung temulung agüja inyaktsü asoshi ward lenir ajak ajungshi aser COVID-19 anema raratsü aser iba wara nokdangtsü atema District Administration ajanga agütsüba tetuyuba ajak tashi anga anidaktsü aser amalitepa telongjem nung inyaka aotsü asoshi ayongzüka liasü.
Paisa, jang-o-tzü aser nüngdakba osettsüsettem alitsü asoshi yimdong nung akok tashi nisung tajemba adenshia lijaliyongdaktsütsü asoshi lenirtem dang mepishi liasü.
Kasa senden nung, Tuensang ADC Ajit-ia, tashidak nokdangtsu aser Covid-19 wara prokshia meyoktsu asoshi linük mokdanga ayutsü koda tongtibang iba indang lemsatepa liasü.
Paisa, nisung kar dak COVID-19 tejangja aliba tendangtetra, item ward shibangtsütsü asoshi senden nung adenertem den tasa balala lemsatep.
Iba ama tensa ka nung nüngdakba mapang teyari agütsütsü asoshi ASHA den volunteer ama training agitsü asoshi tenüngtem agütsütsü mepishiogo, ta kasa sangdong ajanga metetdaktsü.